Protest Against Gyanesh Kumar : मुख्य निवडणूक आयुक्त ज्ञानेश कुमार यांच्या विरोधात जंतर-मंतरवर आंदोलन करण्यासाठी जमलेल्या आंदोलकांवर दिल्ली पोलिसांनी शुक्रवारी कारवाई केली. दिल्लीच्या माजी मुख्यमंत्री आतिशी, आम आदमी पक्षाचे दिल्ली प्रदेशाध्यक्ष सौरभ भारद्वाज, कार्यकर्ते योगेंद्र यादव आणि ऑल इंडिया स्टुडंट्स असोसिएशनच्या (AISA) अध्यक्षा नेहा बोरा यांच्यासह सुमारे 500 जणांना पोलिसांनी ताब्यात घेतले आहे.

ताब्यात घेतलेल्या आंदोलकांना पोलिसांच्या बसमधून दिल्लीतील विविध पोलिस ठाण्यांमध्ये नेण्यात आले. दहा किंवा त्यापेक्षा अधिक जण एकत्र जमल्याचे दिसताच पोलिसांकडून त्यांना आंदोलनाच्या ठिकाणाहून हटवण्यात येत होते.

जंतर-मंतरकडे जाणारा मार्ग पोलिसांनी बंद केला होता. बदरपूर तसेच उत्तर दिल्लीतील विविध पोलिस ठाण्यांमध्ये काही आंदोलकांना नेण्यात आले. दरम्यान, जनपथ परिसरात सुमारे 50 ते 60 आंदोलक अद्याप आंदोलन करत असल्याचे सांगण्यात आले. पोलिसांकडून त्यांना संसद मार्ग आणि जंतर-मंतरच्या दिशेने जाण्यापासून रोखले जात होते.

मतदार याद्यांच्या विशेष सखोल पुनरावलोकनात (SIR) कथित अनियमितता झाल्याच्या निषेधार्थ हे आंदोलन आयोजित करण्यात आले होते. आंदोलकांकडून मुख्य निवडणूक आयुक्त ज्ञानेश कुमार यांच्या राजीनाम्याची मागणी करण्यात येत आहे. दिल्ली पोलिसांनी गुरुवारी या आंदोलनाला परवानगी नाकारली होती. त्यानंतर मध्य दिल्लीतील सुरक्षा व्यवस्था वाढवण्यात आली होती.

दरम्यान, ‘कॉकरोच जनता पार्टी’ (CJP) कडून शुक्रवारी मुंबईतील शिवाजी पार्क येथे मुख्य निवडणूक आयुक्तांविरोधात ‘जेल भरो आंदोलन’ सुरू करण्याची घोषणा करण्यात आली आहे. इंडियन एक्स्प्रेसच्या एका वृत्तात निवडणूक आयोगातील कथित मतभेदांचा उल्लेख करण्यात आल्याचा दावा CJPकडून करण्यात आला आहे.

CJPचे संस्थापक अभिजीत दीपके यांनी गुरुवारी मुंबईत झालेल्या पत्रकार परिषदेत आंदोलनासाठी मुंबईची निवड करण्यामागचे कारण सांगितले. 2024च्या लोकसभा निवडणुकीत भाजपने महाराष्ट्रातील 48 पैकी 9 जागा जिंकल्या, तर त्यानंतर झालेल्या विधानसभा निवडणुकीत परिस्थितीत मोठा बदल झाला, असा दावा त्यांनी केला. या पार्श्वभूमीवर मुंबईतून आंदोलन सुरू करण्याचा निर्णय घेतल्याचे त्यांनी सांगितले.