Election Commission: विशेष सखोल पुनरीक्षण अर्थात SIR प्रक्रियेदरम्यान मतदार यादीतून नाव वगळलेल्या पात्र नागरिकांना पुन्हा नाव नोंदवण्याची संधी देण्याचा निर्णय निवडणूक आयोगाने घेतला आहे. SIR प्रक्रिया पूर्ण झालेल्या २० राज्ये आणि केंद्रशासित प्रदेशांमध्ये यासाठी विशेष मोहीम राबवण्याचे निर्देश आयोगाने दिले आहेत.

या मोहिमेत SIR दरम्यान काही कारणास्तव मतदार यादीतून वगळले गेलेले, तसेच त्यानंतर मतदानासाठी पात्र ठरलेले नागरिक यांची नावे पुन्हा समाविष्ट करण्यावर भर दिला जाणार आहे. त्यासोबतच अद्याप मतदार म्हणून नोंदणी न झालेल्या पात्र तरुण आणि प्रथमच मतदान करणाऱ्या नागरिकांनाही या प्रक्रियेत सहभागी करून घेतले जाणार आहे.

फॉर्म ६द्वारे पुन्हा नाव नोंदवता येणार Election Commission:

SIR पूर्ण झालेल्या राज्ये आणि केंद्रशासित प्रदेशांमध्ये पात्र नागरिकांना मतदार यादीत पुन्हा नाव समाविष्ट करण्यासाठी प्रमाणित फॉर्म ६ भरता येणार आहे. विशेष म्हणजे, SIR प्रक्रियेदरम्यान आवश्यक असलेले अतिरिक्त घोषणापत्र आता आवश्यक राहणार नाही.

आयोगाने स्पष्ट केले आहे की, अतिरिक्त घोषणापत्राची अट केवळ SIR प्रक्रियेपुरती मर्यादित होती. SIR पूर्ण झाल्यानंतर मतदार नोंदणी नियम, १९६० अंतर्गत निर्धारित प्रमाणित फॉर्मचा वापर केला जाईल.

मतदार याद्यांची तुलना करण्याचे निर्देश

निवडणूक आयोगाने राज्यांच्या मुख्य निवडणूक अधिकाऱ्यांना, जिल्हा निवडणूक अधिकाऱ्यांना आणि मतदार नोंदणी अधिकाऱ्यांना पात्र नागरिकांची नावे मतदार यादीत समाविष्ट करण्यासाठी विशेष मोहीम राबवण्याचे निर्देश दिले आहेत.

गुरुवारी झालेल्या व्हिडिओ कॉन्फरन्समध्ये SIRपूर्वी आणि SIRनंतरच्या मतदार याद्यांची तुलना करण्यास सांगण्यात आले. याद्यांमधून वगळलेल्या मतदारांची ओळख पटवण्याचा यामागे उद्देश आहे.

विशेषतः, ज्या मतदाराचे नाव इतर कोणत्याही यादीशी जोडलेले नाही, तसेच ज्यांची नोंद दुबार किंवा मृत मतदार म्हणून झालेली नाही, अशा प्रकरणांची तपासणी करण्याचे निर्देश देण्यात आले आहेत.

BLO घरोघरी जाऊन मदत करणार Election Commission:

अशा पात्र मतदारांची ओळख पटल्यास बूथ-स्तरीय अधिकारी (BLO) त्यांच्या घरी जाऊन फॉर्म ६ भरण्यास मदत करू शकतात. त्यानंतर संबंधित प्रक्रिया पूर्ण करून पात्र नागरिकांचे नाव पुन्हा मतदार यादीत समाविष्ट करण्याची कार्यवाही केली जाऊ शकते.

दरम्यान, २९ सप्टेंबर रोजी निवडणूक आयोगाने सर्व राज्यांच्या मुख्य निवडणूक अधिकाऱ्यांना पत्र पाठवून या विशेष मोहिमेबाबत निर्देश दिले होते. त्यानंतर झालेल्या व्हिडिओ कॉन्फरन्समध्येही या निर्देशांचा पुनरुच्चार करण्यात आला.