Jamkhed News : नागपंचमी यात्रेचे औचित्य साधून कै. विष्णू उस्ताद काशीद प्रतिष्ठान व अजय दादा काशीद मित्र परिवाराच्या (Jamkhed News) वतीने आयोजित २४ व्या भव्य-दिव्य निकाली कुस्त्यांच्या मैदानाने जामखेडकरांच्या डोळ्यांचे पारणे फेडले.

जामखेड महाविद्यालयाच्या प्रांगणात रंगलेल्या या कुस्ती दंगलीत आंतरराष्ट्रीय क्रीडा संकुलाचा पैलवान रविराज चव्हाण याने प्रतिस्पर्ध्यावर प्रेक्षकांचे श्वास रोखणारा ‘गिस्सा’ डाव टाकत मानाच्या पहिल्या कुस्तीची गदा आणि किताब पटकावला.

शहरातील ल.ना.होशिंग विद्यालयातील मैदानातील मानाची (Jamkhed News) पहिली कुस्ती पै. रविराज चव्हाण (आंतरराष्ट्रीय आखाडा, पुणे) आणि पै. महारुद्र कळेज (कुर्डुवाडी) यांच्यात पार पडली. दोन्ही मल्लांनी एकमेकांचे डावपेच उधळत लावलेली ताकद आणि चपळता पाहून कुस्तीप्रेमी अवाक झाले.

अखेर रविराजने अत्यंत कौशल्याने गिस्सा डाव टाकत महारुद्रवर मात केली आणि मैदान मारले.पै. मुसा पहिलवान याने पै. मोईन पटेल याच्यावर विजय मिळवला.पै. शाहरुख खान याने पै. रोहित दैय्या याला चितपट करत विजयश्री खेचून आणली.

या वर्षी परराज्यातून आलेल्या नामवंत मल्लांनीही आखाड्यात हजेरी लावून आपल्या मल्लविद्येचे प्रदर्शन केले. आधीच ठरवून लावलेल्या नियोजनबद्ध कुस्त्यांमुळे कुस्तीप्रेमींना एकापेक्षा एक थरारक लढती पाहायला मिळाल्या.

दरम्यान या कुस्ती मैदानाला प्रमुख अतिथी म्हणून महाराष्ट्र राज्य विधान परिषदेचे सभापती नामदार राम शिंदे उपस्थित होते. आखाड्यातून बोलताना त्यांनी राजकीय दंड थोपटत विरोधकांवर जोरदार निशाणा साधला. “मागच्या वर्षी अर्धवट राहिलेली कुस्ती पुढच्या वर्षी पुन्हा त्यांना बोलावून एकदा ‘दूध का दूध आणि पाणी का पाणी’ होऊन जाऊ द्या. मग कोण कुणाला पाणी पाजतो हे जामखेडच्या जनतेला कळू द्या,” असा थेट आणि खणखणीत राजकीय टोला राम शिंदे यांनी लगावला.

मैदानाला सुरुवात होण्यापूर्वी काढण्यात आलेली भव्य मिरवणूक या कुस्ती सोहळ्याचे मुख्य आकर्षण ठरली. या मिरवणुकीत ‘मराठा गौरव’ युवराज भाऊ काशीद यांची खास उपस्थिती लक्षवेधी ठरली.

अजय दादा काशीद मित्र मंडळाच्या वतीने दरवर्षी सामाजिक बांधिलकी (Jamkhed News) जपत विविध उपक्रम राबवले जातात. यंदा गोळाफेक स्पर्धेत सुवर्णपदक पटकावल्याबद्दल साळुंके सर यांचा विशेष सत्कार करण्यात आला. राजकीय, सामाजिक आणि विविध क्षेत्रांतील मान्यवरांच्या स्वागतासाठी स्वतंत्र आणि भव्य कक्ष उभारण्यात आला होता.

अजय दादा काशीद यांच्या पुढाकारातून सलग २४ वर्षे यशस्वीपणे आयोजित होणाऱ्या या निकाली कुस्त्यांच्या मैदानाने जामखेडच्या वैभवात भर घालत संपूर्ण महाराष्ट्रात आपला एक वेगळा नावलौकिक निर्माण केला आहे.