Jamkhed News : जामखेड शहरातील वाहतुकीची कोंडी फोडण्यासाठी आणि राष्ट्रीय महामार्गाच्या कामातील अडथळे दूर करण्यासाठी प्रशासनाने सुरू केलेल्या अतिक्रमण हटाव मोहिमेचा दुसऱ्याच दिवशी पुरता फज्जा उडाला आहे. (Jamkhed News)

बीड रोडवरील गरिबांच्या टपऱ्या आणि कृषी उत्पन्न बाजार समितीच्या गाळ्यांवर १० फुटांपर्यंत हातोडा चालवणाऱ्या प्रशासनाची मोहीम समर्थ हॉस्पिटल ते बीड रोड कॉर्नर दरम्यान येताच अचानक मंदावली आहे. (Jamkhed News)

राष्ट्रीय महामार्ग विभागाचे उपअभियंता चेमटे आणि त्यांच्या पथकाकडून नगरपरिषद प्रशासनाला अपेक्षीत सहकार्य मिळत नसल्याने या संपूर्ण कारवाईच्या हेतूवरच आता प्रश्नचिन्ह उपस्थित केले जात आहे. (Jamkhed News)

बड्या व्यापाऱ्यांना आणि मोठ्या इमारतींना वाचवण्यासाठी राष्ट्रीय महामार्ग प्राधिकरणाचे अधिकारी स्वतःला बड्यांच्या दावणीला बांधत आहेत का, असा संतप्त सवाल आता जामखेडकर जनता विचारत आहे. (Jamkhed News)

गेल्या तीन वर्षांपासून रखडलेल्या या मोहिमेचा श्रीगणेशा मंगळवारी सकाळी १० वाजता बीड रोडवरील शासकीय दूध डेअरी परिसरापासून महसूल, नगरपरिषद, राष्ट्रीय महामार्ग प्राधिकरण आणि पोलीस प्रशासनाच्या संयुक्त विद्यमाने झाला. (Jamkhed News)

तहसीलदार शितल सावळे, नगरपरिषदेचे मुख्याधिकारी अजय साळवे आणि पोलीस निरीक्षक दशरथ चौधरी यांच्या उपस्थितीत राष्ट्रीय महामार्गाच्या गटारापासून दोन्ही बाजूंना सुमारे १० फूट (३ मीटर) अंतरातील अतिक्रमणे हटवण्यास धडक सुरुवात झाली. (Jamkhed News)

पहिल्या दिवशी लहान-मोठ्या टपऱ्या आणि बाजार समितीचे गाळे पाडून रस्ता मोकळा करण्यात आला. मात्र, बुधवारी दुसऱ्या दिवशी मोहिमेतील ‘हवा’ अचानक काढली गेली. (Jamkhed News)

राष्ट्रीय महामार्ग विभाग आणि भूमिअभिलेख विभागाच्या मोजमापात मोठा फरक आणि तफावत आढळून आल्याने नागरिकांनी तीव्र आक्षेप घेतला आहे. गरिबांचे धंदे उध्वस्त करून त्यांना रस्त्यावर आणणाऱ्या प्रशासनाने, बड्या इमारती आणि वजनदार व्यापाऱ्यांच्या अतिक्रमणांसमोर मात्र नमते घेतल्याचे चित्र बीड रोडवर पाहायला मिळत आहे. (Jamkhed News)

समर्थ हॉस्पिटल ते बीड रोड कॉर्नर दरम्यानच्या पक्क्या अन् मोठ्या बांधकामांवर कारवाई न करताच मोहीम अचानक थांबवण्यात आल्याने स्थानिक नागरिकांचा संताप अनावर झाला आहे. राष्ट्रीय महामार्गाचे उपअभियंता चेमटे यांची या संपूर्ण प्रकरणातील भूमिका अत्यंत संशयास्पद आणि मूकसंमती देणारी वाटत असल्याचा थेट आरोप नागरिकांनी केला आहे. (Jamkhed News)

शहर विकासासाठी आणि वाहतूक कोंडीतून मुक्ती मिळण्यासाठी सरसकट कारवाई होणे अत्यंत गरजेचे असताना, प्रशासनाच्या या ‘निवडक’ आणि ‘पक्षापाती’ कारभाराविरोधात जामखेडमध्ये तीव्र असंतोष पसरला आहे. (Jamkhed News)

जर राष्ट्रीय महामार्ग प्राधिकरणाने नगरपरिषदेला पूर्ण सहकार्य करून शहरातील लहान-मोठ्या सर्वच अतिक्रमणांवर ‘सरसकट’ हातोडा चालवला नाही, तर येत्या दिवसांत स्थानिक लोकप्रतिनिधी आणि संबंधित अधिकाऱ्यांविरोधात व्यापक व तीव्र जनआंदोलन छेडण्याचा इशारा संतप्त नागरिकांनी दिला आहे. (Jamkhed News)

आता तरी सुस्त प्रशासन आणि झोपेचे सोंग घेतलेले लोकप्रतिनिधी जागे होऊन या महामार्गावरील बड्यांच्या अतिक्रमणांवर कारवाई करण्याचे धाडस दाखवणार का, याकडे संपूर्ण तालुक्याचे लक्ष लागले आहे. (Jamkhed News)