James Bond : ‘रॉबर्ट पॅटिन्सन’च्या हाती 007 ची सूत्र; ब्रिटनच्या शाही परिवाराकडून खास स्वागत, ‘बॅटमॅन’, ‘हॅरी पॉटर’मध्ये केले आहे काम
रॉबर्ट पॅटिन्सन हा जेम्स बॉन्डची भूमिका साकारणारा सातवा अधिकृत अभिनेता ठरणार आहे. याआधी सीन कॉनरी, जॉर्ज लेझेनबी, रॉजर मूर, टिमोथी डाल्टन, पिअर्स ब्रॉसनन आणि डॅनियल क्रेग यांनी ही भूमिका साकारली आहे.

James Bond : हॉलिवूडच्या रुपेरी पडद्यावर कधी व्हॅम्पायर, कधी सुपरहिरो तर कधी रहस्यमय भूमिकांमधून प्रेक्षकांच्या मनावर राज्य करणारा अभिनेता आता जगातील सर्वात लोकप्रिय गुप्तहेराच्या भूमिकेत दिसणार आहे. ‘हॅरी पॉटर’मधून अभिनयाची सुरुवात, ‘ट्वायलाईट’मधून जगभरात मिळालेली लोकप्रियता आणि ‘द बॅटमॅन’मधून सुपरहिरो म्हणून केलेली दमदार एंट्री..
असा प्रवास करणाऱ्या ‘रॉबर्ट पॅटिन्सन’च्या शिरपेचात आता आणखी एक मानाचा तुरा रोवला गेला आहे. तब्बल पाच वर्षांच्या प्रतीक्षेनंतर जेम्स बॉन्ड फ्रँचायझीला नवा चेहरा मिळाला असून, 007 या प्रतिष्ठित भूमिकेसाठी रॉबर्ट पॅटिन्सनची अधिकृत निवड करण्यात आली आहे. विशेष म्हणजे, ब्रिटनच्या राजघराण्यानेही त्याच्या या नव्या भूमिकेचे खास शब्दांत स्वागत केले आहे. त्यामुळे हॉलिवूडपासून ते जगभरातील चित्रपटप्रेमींपर्यंत सध्या रॉबर्टच्या नावाचीच चर्चा रंगली आहे.
रॉबर्ट पॅटिन्सन बनणार सातवा जेम्स बॉन्ड!
Amazon MGM Studios ने १६ नोव्हेंबर रोजी अधिकृत घोषणा करत रॉबर्ट पॅटिन्सनच्या नावावर शिक्कामोर्तब केले. यापूर्वी डॅनियल क्रेगने जेम्स बॉन्डची भूमिका साकारली होती. २०२१ मध्ये प्रदर्शित झालेल्या ‘नो टाइम टू डाय’ या चित्रपटानंतर त्याने 007 च्या भूमिकेला निरोप दिला. त्यानंतर पुढचा जेम्स बॉन्ड कोण असेल, याबाबत अनेक दिवसांपासून चर्चा आणि तर्कवितर्क सुरू होते. अखेर या चर्चांना पूर्णविराम मिळाला आहे.
रॉबर्ट पॅटिन्सन हा जेम्स बॉन्डची भूमिका साकारणारा सातवा अधिकृत अभिनेता ठरणार आहे. याआधी सीन कॉनरी, जॉर्ज लेझेनबी, रॉजर मूर, टिमोथी डाल्टन, पिअर्स ब्रॉसनन आणि डॅनियल क्रेग यांनी ही भूमिका साकारली आहे. आता या दिग्गजांच्या यादीत रॉबर्टचे नाव जोडले जाणार आहे.
किंग चार्ल्स यांच्या राजवटीतील पहिला जेम्स बॉन्ड!
रॉबर्ट पॅटिन्सनच्या निवडीचे आणखी एक वैशिष्ट्य म्हणजे तो ब्रिटनचे किंग चार्ल्स तृतीय यांच्या राजवटीतील पहिला जेम्स बॉन्ड ठरणार आहे. ८ सप्टेंबर २०२२ रोजी चार्ल्स तृतीय यांनी ब्रिटनच्या सिंहासनाची सूत्रे स्वीकारली. त्यानंतर जेम्स बॉन्डच्या भूमिकेत येणारा रॉबर्ट हा पहिला अभिनेता असेल.
रॉबर्टची निवड जाहीर झाल्यानंतर ब्रिटनच्या राजघराण्याच्या अधिकृत सोशल मीडिया अकाउंटवरून त्याचे स्वागत करण्यात आले. ‘Welcome to His Majesty’s Secret Service, Mr Bond’ अशा शब्दांत राजघराण्याने पोस्ट केली. जेम्स बॉन्ड हा ब्रिटनच्या गुप्तचर यंत्रणेतील काल्पनिक एजंट असल्याने या पोस्टमधून राजघराण्याने खास अंदाजात त्याचे अभिनंदन केले आहे.
‘हॅरी पॉटर’पासून ‘ट्वायलाईट’पर्यंतचा प्रवास
रॉबर्ट पॅटिन्सनने २००५ मध्ये प्रदर्शित झालेल्या ‘हॅरी पॉटर अँड द गॉब्लेट ऑफ फायर’ या चित्रपटातून प्रेक्षकांचे लक्ष वेधून घेतले. यामध्ये त्याने सेड्रिक डिगरीची भूमिका साकारली होती. मात्र, ‘ट्वायलाईट’ चित्रपट मालिकेने त्याला जगभरात प्रचंड लोकप्रियता मिळवून दिली. एडवर्ड कलन या व्हॅम्पायरच्या भूमिकेमुळे तरुणाईमध्ये त्याची जबरदस्त क्रेझ निर्माण झाली.
यानंतर त्याने अनेक वेगळ्या धाटणीच्या चित्रपटांमध्ये काम केले. २०२२ मध्ये प्रदर्शित झालेल्या ‘द बॅटमॅन’मध्ये त्याने ब्रूस वेन अर्थात बॅटमॅनची भूमिका साकारली. आता बॅटमॅनची केप बाजूला ठेवून तो जेम्स बॉन्डचा ब्लॅक टक्सिडो परिधान करणार आहे. त्यामुळे एका अभिनेत्याच्या कारकिर्दीतील हा मोठा टप्पा मानला जात आहे.
जेम्स बॉन्डशी किंग चार्ल्स यांचे नाते काय?
ब्रिटनच्या राजघराण्याचे जेम्स बॉन्ड चित्रपटांशी जुने नाते आहे. किंग चार्ल्स यांनी राजघराण्याचे सदस्य असताना अनेक बॉन्ड चित्रपटांच्या प्रीमिअरला हजेरी लावली होती. १९८३ मध्ये पहिली पत्नी प्रिन्सेस डायना यांच्यासोबत ‘ऑक्टोपसी’ या चित्रपटाच्या प्रीमिअरला ते उपस्थित होते. याशिवाय ‘अ व्ह्यू टू अ किल’, ‘गोल्डनआय’, ‘डाय अनदर डे’ आणि डॅनियल क्रेगच्या ‘स्कायफॉल’ या चित्रपटांच्या प्रीमिअरलाही त्यांनी हजेरी लावली होती.
विशेष म्हणजे, २०१९ मध्ये ‘नो टाइम टू डाय’ या चित्रपटाच्या शूटिंगदरम्यान चार्ल्स यांनी सेटवर भेट दिली होती. त्यावेळी त्यांनी डॅनियल क्रेगसोबत बराच वेळ संवाद साधला होता. निर्मात्या बार्बरा ब्रोकोली यांनी या भेटीचा उल्लेख करताना दोघांनाही अॅस्टन मार्टिन या गाड्यांची आवड असल्याचे सांगितले होते.







