Jalgaon Train Accident। जळगाव जिल्ह्यातील परधाडे रेल्वे स्थानकाजवळ बुधवारी सायंकाळी झालेल्या भीषण अपघाताने राज्यासह देशभरात हळहळ व्यक्त करण्यात येत आहे. या अपघातात आतापर्यंत 13 रेल्वे प्रवाशांचा मृत्यू झाला असून 25 प्रवाशी जखमी झाले आहेत. हे सर्व प्रवाशी पुष्पक एक्सप्रेसमधील होते. जंखमींवर पाचोरा आणि जळगाव येथील विविध रुग्णालयात उपचार सुरू असून त्या सर्वांची प्रकृती स्थिर असल्याचे प्रशासनाने म्हटले आहे.

दरम्यान, या अपघातातील मृतांचे रात्री उशिरापर्यंत शव विच्छेदन करण्यात आले असून आज सकाळी मृत्यू झालेल्या सर्वांचे शव त्यांच्या मूळ गावी पाठवण्यात येणार आहे. तर काही शव हे नेण्यापलिकडे असल्याने त्यांच्येवर त्यांचे नातेवाईक आल्यावर जळगाव येथेच अंत्यसंस्कार करण्यात येणार असल्याची शक्यता आहे. मृत्युमुखी पडलेले सर्व प्रवाशी हे उत्तर भारतातील आहेत तर तीन जण नेपाळमधील आहे.

चहावाल्याच्या एका वाक्याने होत्याचे नव्हते झाले Jalgaon Train Accident। 
या अपघातासाठी रेल्वेतील एका चहा विक्रेत्याचे एक वाक्य जबाबदार असल्याचे म्हटले जात आहे. या चहा विक्रेत्याने रेल्वेतील एका डब्याला आग लागल्याची अफवा पसरवली आणि भीतीपोटी पुष्पक एक्स्प्रेसमधून काही प्रवाशांनी उड्या मारायला सुरुवात केली. मात्र बाजूने जाणाऱ्या कर्नाटक एक्स्प्रेसच्या धडकेत या सर्व प्रवाशांचा मृत्यू झाल्याची धक्कादायक घटना घडली. या अपघाताबाबत आता ही धक्कादायक माहिती समोर आली आहे. एका चहा विक्रेत्याच्या एका वाक्याने क्षणात होत्याचे नव्हते झाले, अशी माहिती पुष्पक ट्रेनमधील जखमी प्रवाशांनी दिली आहे.

अपघाताविषयी एकनाथ शिंदे म्हणाले… Jalgaon Train Accident। 
सदर घटनेवर उपमुख्यमंत्री एकनाथ शिंदे यांनी एक्सवर पोस्ट करत प्रतिक्रिया दिली. जळगाव जिल्ह्यातील परधाडे रेल्वे स्थानकाजवळ संध्याकाळी झालेल्या दुर्घटनेची माहिती आताच मी प्रशासनाकडून घेतली आहे. आग लागल्याची अफवा पसरल्याने पुष्पक एक्सप्रेस मधून काही प्रवाशांनी शेजारच्या रुळावर उड्या मारल्यामुळे सदर दुर्घटना घडली आहे अशी प्राथमिक माहिती मिळते. रेल्वेचे अधिकारी आणि त्यांची बचाव पथके देखील घटनास्थळी पोहचत आहेत. नक्की किती प्रवासी जखमी आहेत आणि मरण पावले आहेत याविषयी अद्याप आकडेवारी हाती आलेली नाही. मात्र तातडीने बचाव पथकांनी जखमींना रुग्णालयात हलवावे आणि योग्य ते उपचार करावेत अशा सूचना संबंधित प्रशासनाला दिल्या आहेत, अशी माहिती एकनाथ शिंदे यांनी दिली.