दाक्षिणात्य सुपरस्टार रजनीकांत यांच्या जेलर २ चित्रपटाविषयी प्रेक्षकांमध्ये मोठी उत्सुकता आहे. जेलर २ ची घोषणा चित्रपटाच्या दिग्दर्शनकाने एक फनी व्हिडिओ रिलीज करत केली होती. आता चित्रपटाबाबत एक मोठी माहिती समोर आली आहे. या चित्रपटाच्या शुटिंगला लवकरच सुरूवात केली जाणार आहे. ‘जेलर 2’ या चित्रपटात चाहत्यांना पहिल्या भागाप्रमाणेच रजनीकांत पुन्हा एकदा मुथुवेल पांडियनच्या भूमिकेत पाहायला मिळणार आहे.

मीडिया रिपोर्टनुसार, ‘जेलर 2’चे शूटिंग पुढील आठवड्यात सुरू होणार आहे. चित्रपटाची टीम पहिल्यांदा चेन्नईत शूटिंग करणार आहे. त्यानंतर पुढील शूटिंग गोवा आणि तामिळनाडूतील थेनी येथे होणार असल्याचे सांगण्यात आले आहे. या चित्रपटात रजनीकांतसोबत इतरही अनेक मोठ्या नावांची चर्चा आहे.

रिपोर्ट्सनुसार, मल्याळम सुपरस्टार मोहनलाल आणि कन्नड अभिनेता शिवराज कुमार या चित्रपटात विशेष भूमिकेत दिसणार आहेत. मात्र, या बातम्यांना अद्याप अधिकृत दुजोरा मिळालेला नाही. याबाबत निर्मात्यांकडून अद्याप कोणतेही वक्तव्य करण्यात आलेले नाही. ‘जेलर 2’ या चित्रपटाव्यतिरिक्त रजनीकांतकडे ‘कुली’ नावाचा आणखी एक मोठा चित्रपट आहे.

लोकेश कनगराज या चित्रपटाचे दिग्दर्शन करत आहेत. नुकताच ‘जेलर 2’ चा टीझर रिलीज झाला, जो पाहिल्यानंतर चाहत्यांना या चित्रपटाची खूप उत्सुकता लागली आहे. अनिरुद्ध रविचंदरचे संगीत पुन्हा एकदा चित्रपटात ऐकायला मिळणार आहे. दरम्यान, नेल्सन दिलीप कुमार या चित्रपटाचे दिग्दर्शन करणार आहेत. चित्रपटगृहात कधी प्रदर्शित होणार याची तारीख अद्याप अधिकृतपणे जाहीर करण्यात आलेली नाही.