Sanjay Raut : स्वातंत्र्यदिनाच्या निमित्ताने देशाचे पंतप्रधान नरेंद्र मोदी यांनी लाल किल्ल्यावरून ध्वजारोहणानंतर तब्बल १०३ मिनिटं भाषण केलं. या भाषणात मोदींनी मोठ्या घोषणा केल्या आहेत, तर अॅापरेशन सिंदूर, सिंधू जल करार, पाकिस्तानची कारवाया, आणि दहशतवाद्याच्या मुद्यावर प्ररखडपणे त्यांनी भाष्य केलं आहे. मोदींनी आपल्या भाषणातून पाकिस्तानला इशारा दिला आहे. तसेच अमेरिकेलाही कडक शब्दांत इशारा दिला आहे, आता यावरून शिवसेना ठाकरे गटाचे नेते खासदार संजय राऊत यांनी पंतप्रधान नरेंद्र मोदींवर हल्लाबोल केला आहे. पंतप्रधान नरेंद्र मोदी यांनी अमेरिकेचे राष्ट्राध्यक्ष डोनाल्ड ट्रम्प आणि पाकिस्तानला इशारा दिला असे बोलले जात आहे. याबाबत संजय राऊत यांनी मोदी कोणाचेही नाव घेऊन कोणालाही इशारा देत नाही. तेवढी हिंमत त्यांच्यात नाही, अशा शब्दांत टीका केली आहे. तसेच नुसता पाकिस्तानला दम देऊन चालणार नाही, तर चीनला दम दिला पाहिजे की, पाकिस्तानच्या मागे उभे राहिले तर याद राखा, असं राऊत म्हणाले आहेत. नाशिक येथील पत्रकारांशी संजय राऊत यांनी संवाद साधला त्यावेळी ते बोलत होते. संजय राऊत नेमकं काय म्हणाले? पाकिस्तानला इशारा देणे खूप सोपे आहे. पण पाकिस्तानच्या मागे चीन आहे. जनरल मुनीरच्या मागे ट्रम्प आहे हे मोदी कसे विसरतात? लाल किल्ल्यावरून त्यांनी खोटं भाषण करू नये. पाकिस्तानचा आर्मी चीफ मुनीर आम्हाला धमक्या देतो. मुनीरला ट्रम्पने एका टेबलावर व्हाईट हाऊसमध्ये जेवायला बसवले. आमच्या आर्मीच्या चीफला बोलावले का? असा सवाल संजय राऊत यांनी उपस्थित केला आहे. यामुळे मोदींनी ट्रम्पला आव्हान दिले पाहिजे. पाकिस्तानच्या मागे चीन आहे. नुसता पाकिस्तानला दम देऊन चालणार नाही तर चीनला दम दिला पाहिजे की, पाकिस्तानच्या मागे उभे राहिले तर याद राखा, अशा शब्दांत टीकास्त्र डागले आहे. २०१४ नंतर देश खड्ड्यात गेला: राऊत भारताला स्वातंत्र्य मिळून आज 79 पूर्ण झाले आहेत. काही लोकांना वाटत आहे की, 2014 साली देश स्वतंत्र झाला. पण 2014 नंतर देश स्वतंत्र झाला म्हणण्यापेक्षा देश खड्ड्यात गेला आहे, अशी टिप्पणी संजय राऊत यांनी केली आहे. प्रत्येक पंतप्रधानांनी काही ना काहीतरी योगदान दिलेले आहे. भारतीय जनता पक्षाचे दहा वर्षात योगदान इतकेच आहे की, हा देश धार्मिक होता, तो त्यांनी धर्मांध केला आहे, असा गंभीर आरोप राऊतांनी केला आहे. फक्त पंडित नेहरूंचे नाव का घेत आहात? ही धर्मांधता या देशात जातीय धार्मिक फुट पाडत आहे आणि ती देशाच्या स्वातंत्र्याला अत्यंत धोकादायक आहे, असा आरोप राऊतांनी केला आहे. तसेच अरे तुम्ही ट्रम्पचे नाव घ्या. देशाच्या शत्रूचे नाव घ्या. खुलेआम नाव घ्या. फक्त पंडित नेहरूंचे नाव का घेत आहात? असा सवाल त्यांनी केला आहे. हेही वाचा : Jaya Bachchan video : जया बच्चन यांचा आणखी एक व्हिडीओ व्हायरल; वृद्ध महिलेचा हात झिडकारला, कारण काय?
