Israel-Palestine war : आंतरराष्ट्रीय स्तरावर हमास आणि इस्रायल यांच्यातील युद्ध आजही सुरूच आहे.  दरम्यान, हे युद्ध सुरु झाले होते तेंव्हा गाझा पट्टीचून हमासचा नायनाट केल्याशिवाय हे युद्ध थांबणार नसल्याचे इस्रायलने म्हटले होते. त्यानुसार  इस्रायलकडून गाझा पट्टीत हल्ले सुरुच आहेत.  दरम्यान, इस्रायलच्या संरक्षणमंत्र्यांनी मोठं विधान केले आहे. नागरिकांचा आता हमासवर विश्वास राहिलेला नाही, असा दावा इस्रायलचे संरक्षण मंत्री योव गॅलंट यांनी केला आहे. गाझातील नागरिक आता हमासचे तळ लुटत आहेत, असाही दावा त्यांनी केला आहे.

इस्रायल लष्कराने गाझा पट्टीमध्ये आतापर्यंत केलेल्या हल्ल्यात तब्बल 11,240 लोकांचा मृत्यू झाला आहे. यामध्ये 4630 मुलांचा समावेश आहे. गाझावरील हल्ल्यानंतर अनेक दिवसांनी इस्रायलचे संरक्षण मंत्री योव गॅलंट यांनी दावा केला आहे की, हमासचे गाझावरील नियंत्रण सुटले आहे. 16 वर्षांनंतर हमासचे गाझावरील प्रभुत्व संपुष्टात आले आहे,” असे त्यांनी म्हटले आहे.

इस्रायली संरक्षण मंत्र्यांनी दावा केला आहे की, “हमासचा गाझावर 16 वर्षांपासून ताबा होता. पण, हमासने आता गाझा पट्टीवरील नियंत्रण गमावलं आहे. त्यामुळे हमासचे दहशतवादी पळ काढत आहेत. हमासचे दहशतवादी दक्षिणेकडे पळून जात आहेत. हमासचे तळ नागरिकांनी उद्ध्वस्त केले आहेत असा दावा त्यांनी केला आहे.

दरम्यान, गाझाचे सर्वात मोठे रुग्णालय अल-शिफा काही दिवसांपासून युद्धाचे केंद्र बनले आहे. इस्रायलने या हॉस्पिटलवर हल्ला केल्याचा आरोप हमासने केला आहे. पण इस्रायली लष्कराने रुग्णालयाच्या आसपास हमासच्या दहशतवाद्यांवर लक्ष्य करत असल्याचा दावा केला आहे. अल-शिफा या गाझाचे सर्वात मोठे रुग्णालयामध्ये हमास कमांड सेंटर चालवत असल्याचा दावा इस्रायल लष्कराने केला आहे.