Khamenei | Donald Trump : इराण आणि इस्रायलमधील सुरू असलेल्या संघर्षात, अमेरिका आता उघडपणे हस्तक्षेप करण्याची धमकी देत ​​आहे. अशा परिस्थितीत, ८६ वर्षीय इराणी सर्वोच्च नेते अयातुल्ला अली खमेनी यांनी पुढे येऊन अमेरिका आणि इस्रायल दोघांनाही स्पष्ट इशारा दिला आहे.

इराणी सरकारी माध्यमांनुसार, खमेनी यांनी स्पष्ट केले आहे की, जर अमेरिकेने कोणताही लष्करी हस्तक्षेप केला तर त्याचे परिणाम खूप वाईट होतील, जे कधीही भरून काढता येणार नाहीत. असं त्यांनी म्हंटल आहे.

अमेरिकेचे अध्यक्ष डोनाल्ड ट्रम्प यांनी मागितलेल्या ‘बिनशर्त आत्मसमर्पणा’ला खामेनी यांनी थेट उत्तर दिले. ट्रम्प यांनी असेही म्हटले होते की अमेरिकेला खमेनी कुठे लपले आहेत हे माहित आहे, परंतु सध्या त्यांना मारण्याचा त्यांचा हेतू नाही. यावर प्रतिक्रिया देताना खामेनी म्हणाले, ‘ज्यांना इराणचा इतिहास माहित आहे ते धमक्यांची भाषा बोलत नाहीत.’

ट्रम्पच्या अटींपुढे खामेनी झुकणार नाहीत :
खमेनी यांनी त्यांच्या संदेशात इराणी जनतेचे कौतुक केले आणि म्हटले की, इस्रायली हल्ल्यांनंतर लोकांचा संयम आणि धाडस हे त्यांच्या राष्ट्रीय ताकदीचे प्रतीक आहे. त्यांनी म्हटले की इराणी राष्ट्र कोणत्याही लादलेल्या युद्धापुढे झुकणार नाही… आणि कोणताही लादलेल्या शांतता करार स्वीकारणार नाही.

अमेरिका अनेक पर्यायांवर विचार करत आहे :
अमेरिकन सूत्रांनुसार, राष्ट्राध्यक्ष ट्रम्प आणि त्यांचे सल्लागार सध्या इस्रायलच्या सहकार्याने इराणी अणुस्थळांवर हल्ला करण्यासह अनेक पर्यायांवर विचार करत आहेत. तथापि, अद्याप यावर कोणताही अधिकृत निर्णय झालेला नाही.

संयुक्त राष्ट्रांमधील इराणचे राजदूत अली बहरेनी यांनीही इशारा दिला आहे की जर अमेरिका थेट हल्ल्यात सहभागी झाली तर इराण प्रत्युत्तर देईल. त्यांनी आधीच अमेरिकेला इस्रायली हल्ल्यांमध्ये भागीदार म्हटले आहे.