Anita Deepke : १० अॅाक्टोबर रोजी सीजेपीने दिल्लीतील जंतर मंतरवर आंदोलनाची हाक दिली होती. मुख्य निवडणूक आयुक्त ज्ञानेश कुमार यांच्या राजीनामा मागणीसाठी हे आंदोलन पुकारण्यात आलं होतं. मात्र, पोलिसांनी सीजेपीचे संस्थापक अभिजीत दिपके यांना ते दिल्लीत दाखल होण्याअगोदरच विमानात शिरून ताब्यात घेतलं होतं. आज त्यांची सुटका करण्यात आली असून, दिपके यांच्या आईने दिल्ली पोलिसांच्या कारवाईचा तीव्र निषेध नोंदवत गंभीर आरोप केले आहेत.

‘दिल्ली पोलिसांवर विश्वास नाही’; आईचा गंभीर आरोप

अभिजीत यांना ताब्यात घेतल्यानंतर त्यांच्याशी संपर्क होऊ शकला नसल्याचा दावा अनिता दीपके यांनी केला. महाराष्ट्र पोलिसांवर विश्वास आहे, मात्र दिल्ली पोलिस अभिजीतसोबत काहीही करू शकतात, त्यांच्यावर विश्वास नाही, अशी भीती त्यांनी व्यक्त केली.

आजीच्या निधनाची बातमी, पण अंत्यविधीलाही जाता येईना

अभिजीत यांच्या कुटुंबावर एक दुःखाचा प्रसंग ओढवला. त्यांच्या आजीचे हिंगोली येथे निधन झाले. आजीच्या अंत्यविधीसाठी त्यांचे आई-वडील हिंगोलीत पोहोचले; मात्र अभिजीत पोलिसांच्या ताब्यात असल्याने त्यांना कुटुंबीयांसोबत उपस्थित राहता आले नाही.

‘अभिजीतला आजीच्या निधनाची बातमी समजली, तर तो नक्की येईल,’ अशी भावना त्यांच्या आई-वडिलांनी व्यक्त केली. मात्र, अभिजीतला आजीच्या अंत्यदर्शनसाठी येता आले नाही. मुलाच्या परिस्थितीबद्दल बोलताना अनिता दीपके यांना अश्रू अनावर झाले.

न्याय दंडाधिकाऱ्यांच्या आदेशानंतर तिघांची सुटका

दरम्यान, अभिजीत दीपके, आशुतोष रांका आणि सौरव दास यांना दिल्ली पोलिसांनी ताब्यात घेतल्यानंतर आज त्यांच्या सुटकेचे आदेश कार्यकारी न्याय दंडाधिकाऱ्यांनी दिले. सुनावणीदरम्यान तिघांना ताब्यात घेण्याची आवश्यकता काय होती, असा सवाल न्यायालयाने उपस्थित केला. अभिजीत दीपके आंदोलनस्थळी गेले नव्हते आणि त्यांनी प्रतिबंधात्मक आदेशांचे उल्लंघन केले नव्हते, असा युक्तिवाद त्यांच्या वकिलांनी केला. त्यानंतर तिघांची सुटका करण्यात आली. आता सुटका झाल्यानंतर अभिजीत दीपके, आशुतोष रांका आणि सौरव दास हे आंदोलन तसेच दिल्ली पोलिसांच्या कारवाईबाबत काय भूमिका मांडतात, याकडे लक्ष लागले आहे.

CJP Protest: दिपके-रांका आणि सौरव दास यांना दिलासा ; सरन्यायाधीशांच्या आंदोलनासाठी ‘या’ अटी