US Israel Iran War: इराणवर हल्ला करून तेथील कट्टरतावादी सरकार हटवता येईल असा दावा करणाऱ्या अमेरिकेचे राष्ट्राध्यक्ष डोनाल्ड ट्रम्प यांच्यासाठी एक मोठा धक्का बसला आहे. अमेरिकन गुप्तचर संस्था सीआयएने (CIA) दिलेल्या अहवालानुसार, इराणमधील सत्ताधारी नेतृत्व अजूनही स्थिर असून सरकार कोसळण्याची कोणतीही शक्यता नाही. CIA चा अहवाल काय सांगतो? २८ फेब्रुवारी रोजी इराणचे सर्वोच्च नेते अयातुल्ला खामेनी यांचे निधन झाले. मात्र त्यानंतरही इराणमधील कट्टर नेतृत्व सत्तेत मजबूत असल्याचे या अहवालात नमूद करण्यात आले आहे. देशातील एकजूट कायम असून युद्ध संपवण्याचा मार्ग सोपा नाही, असेही अहवालात स्पष्ट करण्यात आले आहे. या अहवालावर व्हाईट हाऊसकडून अद्याप कोणतीही अधिकृत प्रतिक्रिया देण्यात आलेली नाही. १० दिवसांत ८३ हजार कोटींचा खर्च या युद्धाचा अमेरिकेच्या अर्थव्यवस्थेवर मोठा भार पडत असल्याचेही अहवालातून उघड झाले आहे. अवघ्या १० दिवसांत अमेरिकेने सुमारे ८३ हजार कोटी रुपये खर्च केले. यात बॉम्ब व क्षेपणास्त्रांवर २८ हजार कोटी, हवाई मोहिमांसाठी १,२०० कोटी तर नौदल मोहिमांसाठी ७०० कोटी रुपयांचा समावेश आहे. हेही वाचा: भारतात पेट्रोल, डिझेल किंवा अन्य कोणत्याही इंधनाचा तुटवडा नाही – पेट्रोलियम मंत्री हरदीप पुरी ट्रम्प यांचा विजयाचा दावा कायम या सर्व घडामोडींनंतरही ट्रम्प यांनी युद्ध जिंकल्याचा दावा कायम ठेवला आहे. इराणचे अनेक महत्त्वाचे नेते मारले गेले असून इराणची ५८ जहाजे नष्ट करण्यात आली आहेत, असे त्यांनी सांगितले. इराणचे लष्कर, वायुदल आणि नौदल जवळपास उद्ध्वस्त झाले असल्याचा दावाही त्यांनी केला. “अमेरिका जेव्हा ठरवेल तेव्हा युद्ध थांबेल आणि ते लवकरच संपणार आहे,” असे ट्रम्प म्हणाले. इराणच्या युद्धविरामासाठी तीन अटी दुसरीकडे इराणने युद्ध थांबवण्यासाठी तीन ठोस अटी घातल्या आहेत. तेहरानच्या कायदेशीर हक्कांना आंतरराष्ट्रीय स्तरावर मान्यता देणे, युद्धामुळे झालेल्या नुकसानाची आर्थिक भरपाई करणे आणि भविष्यात इराणवर कोणताही हल्ला होणार नाही याची ठोस हमी देणे — या तीन अटी पूर्ण झाल्यासच युद्धविरामाच्या दिशेने पावले उचलली जातील, असे इराणकडून स्पष्ट करण्यात आले आहे.