Iran US Deal : इराण आणि अमेरिका यांच्यातील युद्ध रोखण्यासाठी पाकिस्तान पुन्हा एकदा मध्यस्थी करण्याच्या भूमिकेतुन जगासमोर येत आहे. कारण या दोन्ही देशातील अणुकरार कोणत्याही क्षणी जाहीर केला जाऊ शकतो. तेहरानपासून वॉशिंग्टनपर्यंत या करारासंदर्भात तीव्र हालचाली सुरू आहेत. इराणला अमेरिकेचा मसुदा प्रस्ताव मिळाला आहे, ज्याचे पुनरावलोकन केले जात आहे. कराराचा प्रस्ताव एका सामंजस्य कराराच्या स्वरूपात आहे. तो कतारने तयार केला असून, पाकिस्तानचे गृहमंत्री मोहसिन नक्वी यांनी तो घेऊन तेहरानला भेट दिली. नक्वी यांनी त्याठिकाणी इराणच्या वरिष्ठ नेत्यांशी चर्चा केली. अल अरबियाच्या वृत्तानुसार, दोन्ही बाजूंनी दिलेल्या संकेतांनुसार या प्रस्तावावर एकमत झाल्याचे दिसत आहे. इराणकडून प्रतिसाद मिळताच हा करार जाहीर केला जाईल. बुधवारी पत्रकारांच्या प्रश्नाला उत्तर देताना अमेरिकेचे अध्यक्ष डोनाल्ड ट्रम्प म्हणाले की, करार कसा जाहीर केला जाईल याच्या तपशिलावर अद्याप चर्चा झालेली नाही. दरम्यान, तेहरानमध्ये या करारासंदर्भात तीव्र हालचाली सुरू आहेत. तस्नीम वृत्तसंस्थेनुसार, पाकिस्तानचे लष्करप्रमुख आसिम मुनीर तेहरानच्या दौऱ्यावर आहेत. कराराच्या प्रस्तावात काय समाविष्ट आहे? (Iran US Deal ) वृत्तानुसार, कराराचा मसुदा एका सामंजस्य कराराच्या स्वरूपात आहे. पूर्वी असे वृत्त होते की, दोन्ही देश प्रथम एका पानाच्या प्रस्तावावर सहमत होतील आणि त्यानंतर अणु करारावर सविस्तर चर्चा होईल. परिणामी, असा विश्वास आहे की, इराणला दिलेला अमेरिकेचा सध्याचा प्रस्ताव देखील एका पानाचाच असेल. समोर आलेल्या माहितीनुसार, “जर दोन्ही पक्ष कराराच्या प्राथमिक मुद्द्यांवर सहमत झाले, तर सविस्तर कराराला अंतिम स्वरूप देण्यासाठी हज यात्रेनंतर समोरासमोर बैठक घेतली जाईल. Iran US Deal : अमेरिकन मीडिया आउटलेट ‘ॲक्सिऑस’नुसार, हा मसुदा कतारने तयार केला आहे. कतार दोन्ही पक्षांना समाधानी ठेवण्याचा आणि मध्य-पूर्वेत शांतता प्रस्थापित करण्याचा प्रयत्न करत आहे. कतारचे पंतप्रधान अल थानी या प्रयत्नात सक्रियपणे सहभागी आहेत. या करारामध्ये अडचण कुठे आहे? (Iran US Deal ) अणु करारासंदर्भात अमेरिकेच्या तीन मुख्य मागण्या आहेत. पहिली, इराणने जाहीर केले पाहिजे की तेहरान कधीही अण्वस्त्रे विकसित करणार नाही. दुसरी, इराणने आपले संवर्धित युरेनियम अमेरिकेला हस्तांतरित करावे. तिसरी, इराणने आखातातील आपले हस्तक नष्ट करावेत. दरम्यान, इराणचा आग्रह आहे की त्याच्या क्षेपणास्त्रांसंदर्भात कोणतीही चर्चा होऊ नये. होर्मुझच्या सामुद्रधुनीवर टोल नाके उभारल्याबद्दल इराणला आंतरराष्ट्रीय मान्यता हवी आहे. अमेरिकेने आर्थिक निर्बंध हटवावेत आणि आपला गोठवलेला निधी सोडावा, अशी मागणी इराणने केली आहे.