Iran Threatens To Stop Matches FIFA World Cup 2026 : अमेरिका, कॅनडा आणि मेक्सिको येथे सुरू होणाऱ्या फिफा विश्वचषक २०२६ स्पर्धेला मैदानावरील सामन्यांपूर्वीच राजकीय वादाचे ग्रहण लागले आहे. इराणचे क्रीडा मंत्री अहमद दुन्यामाली यांनी आंतरराष्ट्रीय फुटबॉल महासंघाला एक अत्यंत गंभीर आणि धक्कादायक इशारा दिला आहे. विश्वचषक सामन्यांदरम्यान स्टेडियममध्ये इराण सरकारने अधिकृतपणे मान्यता न दिलेले झेंडे (ध्वज) फडकवले किंवा इराणच्या राष्ट्रीय संघाविरुद्ध घोषणाबाजी करण्यात आली, तर इराणचा संघ थेट सामना मध्येच रोखून मैदान सोडतील, असा थेट इशारा दुन्यामाली यांनी दिला आहे.

मॅनेजरवर असेल सामना रोखण्याची जबाबदारी –

इराणी प्रसारमाध्यमांच्या वृत्तानुसार, क्रीडा मंत्री दुन्यामाली यांनी स्पष्ट केले की, “आम्ही फिफाला आमच्या भूमिकेची स्पष्ट कल्पना दिली आहे. विश्वचषकात इराणचे सामने ज्या स्टेडियममध्ये होणार आहेत, तिथे जर अनधिकृत झेंडे आणले गेले किंवा देशविरोधी घोषणाबाजी झाली, तर सामना थांबवण्याची सर्वस्वी जबाबदारी आमच्या टीम मॅनेजरची असेल.” त्यांनी पुढे सांगितले की, इराणच्या अधिकाऱ्यांना ग्रुप स्टेजमधील शेवटच्या सामन्याबाबत ‘फिफा’कडून सुरक्षा आश्वासन मिळाले असून, २६ जून रोजी सिएटल येथे इजिप्तविरुद्ध होणाऱ्या सामन्यात कोणताही अनुचित प्रकार घडणार नाही, अशी खात्री देण्यात आली आहे.

इराण संघाला बाहेर करण्याची झाली होती मागणी –

Iran Football Team reminds me of Nazim Hikmat’s ‘HIROSHIMA CHILD’-

“All that I need is that for peace
You fight today you fight today
So that the children of this world
Can live and grow and laugh and play.” pic.twitter.com/eJZfwFPhjD

— Mayukh Biswas (@MayukhDuke) June 11, 2026

इराणच्या संघात सध्या अंतर्गत आणि बाह्य पातळीवर प्रचंड तणाव सुरू आहे. एप्रिल महिन्यात व्हँकुव्हर येथे झालेल्या फिफा काँग्रेसदरम्यान स्टेडियमबाहेर हजारो आंदोलक जमा झाले होते. हा राष्ट्रीय फुटबॉल संघ सामान्य इराणी जनतेचे प्रतिनिधित्व न करता देशातील ‘इस्लामिक रिव्होल्युशनरी गार्ड कॉर्प्स’ या लष्करी संघटनेचे प्रतिनिधित्व करतो, असा आरोप करत आंदोलकांनी इराणला विश्वचषकातून थेट बाहेर काढण्याची मागणी केली होती.

तिकिटे रद्द; अमेरिकेने लादले कडक निर्बंध –

भू-राजकीय तणावामुळे इराणच्या संघाला अनेक प्रशासकीय अडचणींचा सामना करावा लागत आहे. विश्वचषक सुरू होण्यापूर्वीच फिफाने इराणच्या समर्थकांचे तिकीट वाटप अचानक रद्द केले, ज्यामुळे आधीच प्रवासाचे नियोजन केलेल्या अनेक इराणी चाहत्यांना मोठा धक्का बसला आहे. सध्या हा संघ मेक्सिकोतील ‘तिजुआना’ येथे सराव करत आहे. सुरक्षा कारणास्तव अमेरिकेच्या ‘होमलँड सिक्युरिटी’ विभागाने इराणच्या संघाला केवळ सामना सुरू होण्याच्या एक दिवस आधीच अमेरिकेत प्रवेश करण्याची परवानगी दिली आहे.

हेही वाचा – Anvay Dravid Selection : ‘द वॉल’चा वारसदार मैदान गाजवण्यासाठी सज्ज! राहुल द्रविडचा लहान मुलगा अन्वयची भारतीय संघात निवड

यंदाच्या विश्वचषकात इराणचा संघ ‘ग्रुप-जी’ मध्ये असून, त्यांचा पहिला सामना १५ जून रोजी लॉस एंजेलिस येथे न्यूझीलंडविरुद्ध होणार आहे. त्यानंतर २१ जूनला बेल्जियम आणि २६ जूनला इजिप्तविरुद्ध इराणचा संघ मैदानात उतरेल.