Petrol Diesel Price Hike :  अमेरिका आणि इराण यांच्यातील संघर्ष अधिक तीव्र होत असून त्याचे पडसाद आता जागतिक अर्थव्यवस्थेसह भारतातील इंधनदरांवरही उमटू लागले आहेत. अमेरिकेने इराणवर पुन्हा हल्ले केल्यानंतर इराणनेही कठोर प्रत्युत्तर देण्याचा इशारा दिला आहे. या पार्श्वभूमीवर आंतरराष्ट्रीय बाजारात कच्च्या तेलाच्या किमती झपाट्याने वाढत असून भारतात पेट्रोल-डिझेल आणखी महाग होण्याची शक्यता व्यक्त केली जात आहे.

इराणच्या इस्लामिक रिव्होल्यूशनरी गार्डने होर्मुज सामुद्रधुनी परिसरातील इराणी क्षेपणास्त्र तळ आणि नौकांवर अमेरिकेने केलेल्या कारवाईनंतर युद्धविरामाचे उल्लंघन झाल्यास प्रत्युत्तर देण्याचा अधिकार राखून ठेवला असल्याचे स्पष्ट केले. त्यामुळे मध्यपूर्वेतील तणाव आणखी वाढण्याची भीती व्यक्त होत आहे.

कच्च्या तेलाच्या दरात मोठी उसळी –

अमेरिका आणि इस्रायलने २८ फेब्रुवारीपासून इराणवर संयुक्त हल्ले सुरू केल्यानंतर जागतिक तेलबाजार अस्थिर झाला आहे. संघर्षानंतर इराणने होर्मुज सामुद्रधुनी बंद केल्यामुळे तेलपुरवठ्यावर परिणाम झाला. परिणामी आंतरराष्ट्रीय बाजारात कच्च्या तेलाचा दर प्रति बॅरल 100 डॉलरच्या आसपास आहे. यापूर्वीही हा दर 110 डॉलरच्या पुढे गेला होता. तज्ज्ञांच्या मते, संघर्ष दीर्घकाळ सुरू राहिल्यास कच्च्या तेलाच्या किमती पुन्हा 100 डॉलरच्या पुढे जाण्याची शक्यता आहे.

भारतातही इंधनदरवाढीचा फटका –

मध्यपूर्वेतील संकटाचा परिणाम आता भारतातही जाणवू लागला आहे. तोट्यात चाललेल्या तेल कंपन्यांनी मागील काही दिवसांत पेट्रोल-डिझेलच्या दरात सलग वाढ केली आहे. गेल्या ११ दिवसांत चार वेळा इंधनदर वाढवण्यात आले असून त्यामुळे सर्वसामान्यांच्या खर्चात भर पडली आहे.

२५ मे रोजी पेट्रोलच्या दरात प्रति लिटर २.६१ रुपये तर डिझेलमध्ये २.७१ रुपयांची वाढ करण्यात आली. याआधी १५ मे रोजी पेट्रोल-डिझेलमध्ये प्रत्येकी ३ रुपयांची वाढ करण्यात आली होती. त्यानंतर १९ मे रोजी ९० पैशांची, तर २३ मे रोजी पेट्रोलमध्ये ८७ पैसे आणि डिझेलमध्ये ९१ पैशांची वाढ झाली होती. अशाप्रकारे गेल्या ११ दिवसांत पेट्रोल सुमारे ७.४० रुपयांनी महागले आहे.

देशातील प्रमुख शहरांतील इंधनदर –

देशात सर्वाधिक महाग पेट्रोल मध्य प्रदेशातील भोपाळमध्ये विकले जात असून तेथे पेट्रोलचा दर ११४.६५ रुपये प्रति लिटर आहे. डिझेल ९९.७४ रुपये प्रति लिटर दराने मिळत आहे.

त्याखालोखाल कोलकात्यात पेट्रोल ११३.५१ रुपये आणि डिझेल ९९.८२ रुपये प्रति लिटर आहे. पटण्यात पेट्रोल ११२.६६ रुपये तर डिझेल ९९.८७ रुपये प्रति लिटर दराने विकले जात आहे. जयपूरमध्ये पेट्रोल ११२.६६ रुपये आणि डिझेल ९७.७८ रुपये प्रति लिटर आहे. मुंबईत पेट्रोल १११.२१ रुपये तर डिझेल ९७.८३ रुपये प्रति लिटरवर पोहोचले आहे.

महागाई वाढण्याची भीती –

कच्च्या तेलाच्या वाढत्या किमतींमुळे वाहतूक खर्च वाढण्याची शक्यता असून त्याचा परिणाम अन्नधान्य, जीवनावश्यक वस्तू आणि उद्योगांवर होऊ शकतो. त्यामुळे येत्या काही दिवसांत सर्वसामान्यांना महागाईचा आणखी मोठा फटका बसण्याची शक्यता वर्तवली जात आहे.