Iran attack : इराणकडून आता कुवेतमध्येही हल्ले; अली अल-सालेम या अमेरिकेच्या हवाई तळावर केला हल्ला
इराणने अलिकडेच बहरिनमधील अमेरिकेच्या ठिकाणांवरही हल्ले केल्याचे दावे केले होते. अमेरिका आणि इस्रायलने मिळून २८ फेब्रुवारी रोजी इराणवर हल्ले सुरू केले.

Iran attack – इराणकडून आता कुवेतमधील अमेरिकेच्या ठिकाणांवरही हल्ले केले गेले आहेत. कुवेतमधील अली अल-सालेम या अमेरिकेच्या हवाई दलाच्या तळावर ड्रोन हल्ला केल्याचा दावा इराणच्या सैन्यदलाने केला आहे. यामुळे कुवेतमधील हवाई संरक्षण प्रणाली अलिकडच्या काही आठवड्यात प्रथमच कार्यान्वित करण्यात आल्याचे कुवेतने म्हटले आहे.
या हवाई तळावरील हवाई संरक्षण प्रणाली, तसेच ड्रोन आणि क्षेपणास्त्र लॉंच प्लॅटफॉर्मला लक्ष्य केल्याचे इराणच्या सरकारी वृत्तसंस्थेने म्हटले आहे. मात्र मध्यपूर्वेतील अमेरिकेच्या सैन्य दलांच्या व्यवहारांवर देखरेख करणाऱ्या यूएस सेंट्रल कमांडने यावर त्वरित कोणतीही प्रतिक्रिया दिली नाही.
इराणने डागलेली ड्रोन हवेतच अडवली जात असल्याचे कुवेतच्या सैन्याने बुधवारीच म्हटले होते. या ड्रोनमुळे किती नुकसान झाले, याबद्दल त्वरित काहीही माहिती देण्यात आली नव्हती. इराणकडून सातत्याने करण्यात येणाऱ्या गुन्हेगारी स्वरुपांच्या हल्ल्यांवर कुवेतच्या परराष्ट्र मंत्रालयाने टीका केली आहे. या हल्ल्यांमुळे कुवेतच्या स्थिरतेला आणि सुरक्षेला धोका निर्माण होत असल्याचा इशाराही दिला गेला आहे.
इराणने अलिकडेच बहरिनमधील अमेरिकेच्या ठिकाणांवरही हल्ले केल्याचे दावे केले होते. अमेरिका आणि इस्रायलने मिळून २८ फेब्रुवारी रोजी इराणवर हल्ले सुरू केले, तेंव्हापासूनच इराणकडून शेजारी आखाती देशांमधील अमेरिकेच्या ठिकाणांवर आणि पायाभूत सुविधांवर हल्ले करायला सुरुवात केली आहे.





