नगर – अमरधामसमोरील किरण मोबाईल शॉपीसमोर बसून ऑनलाईन अ ॅपद्वारे आयपीएल क्रिकेट मॅचवर सट्टा घेणाऱ्या बुकीला कोतवाली पोलिसांनी पकडले. शैलेस बाळकृष्ण लाटणे (वय 33 रा. सुयोगपार्क, लोंढेवस्तीजवळ, नगर) असे पकडलेल्या बुकीचे नाव आहे. त्याच्यासह सट्टा लावणारा नितीन कदम (रा. केडगाव) याच्याविरूध्द कोतवाली पोलीस ठाण्यात गुन्हा दाखल करण्यात आला आहे.

शनिवारी रात्री साडे दहा वाजता ही कारवाई करण्यात आली. लाटणेकडून 10 हजार रूपये किमतीचा एक मोबाईल जप्त करण्यात आला आहे. सध्या आयपीएल क्रिकेट मॅचवर मोठ्या प्रमाणात सट्टा बाजार सुरू आहे. यातून कोट्यावधी रूपयांची दररोज उलाढाल होत आहे. येथील अमरधामसमोरील किरण मोबाईल शॉपीसमोर बसून एक व्यक्ती आयपीएल क्रिकेट मॅचवर सट्टा घेत असल्याची माहिती पोलीस निरीक्षक चंद्रशेखर यादव यांना मिळाली होती.

त्यांनी उपनिरीक्षक मनोज कचरे, अंमलदार तनवीर शेख, योगेश भिंगारदिवे, ए. पी. इनामदार, संदीप थोरात, कैलास शिरसाठ, सागर मिसाळ, सोमनाथ राऊत, सुजय हिवाळे यांना कारवाई करण्याचे आदेश दिले. पोलिसांनी दोन पंचासमक्ष नमूद ठिकाणी छापा टाकून कारवाई केली आहे. या कारवाईमुळे सट्टा खेळणाऱ्यांचे धाबे दणाणले आहेत.