छत्रपती संभाजीनगर – छत्रपती संभाजीनगर (Chhatrapati SambhajiNagar) जिल्ह्यात देखील मराठा आरक्षण दिवसेंदिवस उग्र होत आहे. कायदा सुव्यवस्थेचा प्रश्न निर्माण होण्याची शक्‍यता असल्याने व मराठा आरक्षणासंदर्भात (Maratha Arakshan) अपप्रचार केला जात असल्याने प्रशासनाच्या वतीने खबरदारी म्हणून ग्रामीण भागातील इंटरनेट सेवा बंद करण्याचा निर्णय घेण्यात आला.

राज्याच्या गृह विभागाने बुधवारी (दि.1 ) पासून 3 नोव्हेंबर 2023 पर्यंत एकूण 48 तासांसाठी इंटरनेट (internet ban) सेवा बंद करण्याचा निर्णय घेतला आहे. इंटरनेट सेवा जिल्ह्यातील 9 तालुक्‍यात बंद असणार आहे. यामध्ये छत्रपती संभाजीनगर, सिल्लोड, सोयगाव, गंगापूर, खुलताबाद, पैठण, वैजापूर, कन्नड, फुलंब्री तालुक्‍याचा समावेश आहे. गृह विभागाचे अतिरिक्त मुख्य सचिव सुजाता सैनिक यांच्या आदेशाने इंटरनेट सेवा बंदचे आदेश काढण्यात आले. इंटरनेट सेवा बंद झाल्याने उद्योग व्यवसायावर परिणाम होत आहे. (internet ban in sambhajinagar)

दुसरीकडे संभाजीनगर शहरात देखील इंटरनेट सेवेत देखील व्यत्यय येत असल्याने व्यावसायिक व आस्थापनांमध्ये समस्या निर्माण झालेली पाहायला मिळत आहे. लोकांकडून देखील तशा प्रकारच्या तक्रारी केल्या जात आहेत.

जिल्ह्यात जमावबंदी आदेश
जिल्हा प्रशासनाच्या वतीने जिल्हाभरात जमावबंदीचे आदेश जारी करण्यात आलेले आहे. मराठा आरक्षणाच्या अनुषंगाने सोशल मीडियावर अफवा पसरवल्या जावू नये, त्यासाठी हा निर्णय घेण्यात आला. तसेच बीड, धाराशिव या जिल्ह्यांमध्ये देखील इंटरनेट सेवा पूर्णपणे अद्यापही बंद करण्यात आलेली आहे. दरम्यान, ही सेवा पुन्हा त्वरीत कार्यरत केली जावी, अशी मागणी देखील लोकांकडून केली जात आहे.