नेवासे : शैक्षणिक वर्ष २०२६-२७ च्या सुरुवातीलाच, तेलकूडगाव (ता. नेवासा) येथील कै. संत हरीभाऊ आनंदराव घाडगेपाटील माध्यमिक व उच्च माध्यमिक विद्यालयात ‘जागतिक योग दिन’ आणि ‘फादर्स डे’ मोठ्या उत्साहात साजरा करण्यात आला. या संयुक्त उपक्रमाला विद्यार्थी – शिक्षक आणि पालकांचा मोठा उत्स्फूर्त प्रतिसाद लाभला.

योग साधना आणि तज्ञांचे मार्गदर्शन

कार्यक्रमाचे प्रमुख अतिथी म्हणून कुकाणा येथील योग शिक्षक प्रशांत कासार आणि धर्मेंद्र हमनापूकर उपस्थित होते. जागतिक योग दिनाचे औचित्य साधत त्यांनी उपस्थित विद्यार्थ्यांना योगाचे मानवी जीवनातील महत्त्व पटवून दिले. केवळ व्याख्यान न देता, त्यांनी विविध योगासने, प्राणायाम आणि सूर्य नमस्कारांची प्रत्यक्ष प्रात्यक्षिके करून घेतली.

त्यांच्या मार्गदर्शनाखाली विद्यार्थ्यांनी अत्यंत शिस्तबद्ध पद्धतीने योगासने केली नियमित योग केल्याने शारीरिक आणि मानसिक आरोग्य कसे उत्तम राहते याबाबत त्यांनी मोलाचा सल्ला दिला. ‘फादर्स डे’ निमित्त बहारदार सांस्कृतिक कार्यक्रम योग दिनासोबतच विद्यालयात ‘फादर्स डे’ (पितृ दिन) देखील साजरा करण्यात आला.

या निमित्ताने त्रिमूर्ती पब्लिक स्कूलच्या विद्यार्थ्यांनी एक अत्यंत सुंदर आणि भावूक बहारदार नृत्य सादर केले. वडिलांचे आपल्या आयुष्यातील स्थान आणि त्यांचे कष्ट यावर आधारित या नृत्याने उपस्थितांची मने जिंकली आणि कार्यक्रमात एक वेगळीच रंगत आणली.

मान्यवरांची उपस्थिती

याप्रसंगी विद्यालयाच्या प्रशासक मनिषा राऊत आणि प्राचार्य भाऊसाहेब दुधाडे प्रामुख्याने उपस्थित होते. त्यांनी दोन्ही आंतरराष्ट्रीय दिनांचे महत्त्व अधोरेखित करत विद्यार्थ्यांचे कौतुक केले. या सोहळ्याला विद्यालयातील सर्व शिक्षक, शिक्षकेतर कर्मचारी वृंद, तसेच मोठ्या संख्येने पालक उपस्थित होते.

विद्यार्थ्यांमध्ये आरोग्याची जाणीव निर्माण करणारा आणि पालकांविषयी कृतज्ञता व्यक्त करणारा हा संयुक्त सोहळा अत्यंत उत्साहात आणि यशस्वीरित्या संपन्न झाला. सदर कार्यक्रमाचे संचालन जेष्ठ शिक्षक कालिदास बडे तर आभार सुनयना बरे यांनी मानले.