मुंबई: महाराष्ट्राच्या माहिती आयोगाला नवे नेतृत्व मिळाले असून, राज्याचे मुख्य माहिती आयुक्त म्हणून राहुल पांडे यांची नियुक्ती झाली आहे. त्यांच्यासह विभागीय माहिती आयुक्तपदी गजानन निमदेव, रवींद्र ठाकरे आणि प्रकाश इंदलकर यांची निवड करण्यात आली आहे. महाराष्ट्राचे राज्यपाल सी. पी. राधाकृष्णन यांनी यासंदर्भातील अधिसूचना जारी केली आहे. या नियुक्त्यांमुळे प्रशासनातील पारदर्शकता आणि माहितीच्या अधिकाराची अंमलबजावणी अधिक प्रभावी होईल, अशी आशा व्यक्त होत आहे.

राहुल पांडे हे नागपूरचे ज्येष्ठ पत्रकार असून, त्यांनी पत्रकारितेत दीर्घकाळ योगदान दिले आहे. यापूर्वी ते नागपूर विभागाचे माहिती आयुक्त म्हणून कार्यरत होते. माहिती अधिकाराच्या अंमलबजावणीत त्यांनी महत्त्वाची भूमिका बजावली असून, त्यांची लेखनशैली आणि पारदर्शकतेसाठी असलेली बांधिलकी या नव्या जबाबदारीत मोलाची ठरणार आहे. त्याचप्रमाणे, गजानन निमदेव हे देखील नागपूरमधील पत्रकारितेतील अनुभवी नाव आहे. सामाजिक विषयांवरील त्यांचे सखोल कार्य या पदावर उपयुक्त ठरेल.

अनुभवी प्रशासकांचाही समावेश-

रवींद्र ठाकरे हे माजी आयएएस अधिकारी असून, त्यांनी जिल्हाधिकारी आणि विभागीय आयुक्तांसारख्या महत्त्वाच्या पदांवर काम केले आहे. नागरिकाभिमुख प्रशासन रुजवण्यात त्यांचा मोठा वाटा राहिला आहे. दुसरीकडे, प्रकाश इंदलकर हे माजी प्रशासकीय अधिकारी असून, ग्रामीण आणि शहरी विकास क्षेत्रातील त्यांचा अनुभव माहिती आयोगाच्या कार्याला नवी दिशा देईल. या चौघांचा कार्यकाळ पुढील तीन वर्षांचा असेल.

पारदर्शकतेसाठी नवे पाऊल –

नागरिकांना वेळेवर आणि अचूक माहिती मिळावी, तसेच प्रशासनात पारदर्शकता वाढावी, या उद्देशाने या नियुक्त्या महत्त्वपूर्ण मानल्या जात आहेत. नव्या नेतृत्वामुळे माहिती आयोगाची कार्यक्षमता वाढेल, असा विश्वास व्यक्त केला जात आहे.