IndiGo : विमान प्रवास करणाऱ्या प्रवाशांच्या खिशावर आता आणखी भार पडणार आहे. देशातील प्रमुख विमान कंपनी IndiGo ने विमान इंधन म्हणजेच एव्हिएशन टर्बाइन फ्यूल (ATF)च्या वाढत्या किमतीच्या पार्श्वभूमीवर देशांतर्गत आणि आंतरराष्ट्रीय विमानांसाठी फ्यूल सरचार्ज वाढवण्याचा निर्णय घेतला आहे. ही वाढ ६ ऑक्टोबरपासून लागू होणार आहे.

देशांतर्गत विमानांच्या अंतरानुसार फ्यूल सरचार्जमध्ये १०० ते ३५० रुपयांपर्यंत वाढ करण्यात आली आहे. ५०० किलोमीटरपर्यंतच्या प्रवासासाठी सरचार्ज ३७५ रुपये, ५०१ ते १,००० किलोमीटरसाठी ६०० रुपये, १,००१ ते १,५०० किलोमीटरसाठी ९०० रुपये, १,५०१ ते २,००० किलोमीटरसाठी १,१५० रुपये, तर २,००० किलोमीटरपेक्षा जास्त अंतरासाठी १,३०० रुपये आकारले जातील.

आंतरराष्ट्रीय प्रवासासाठीही सरचार्ज वाढवण्यात आला आहे. SAARC देशांसाठी १,००० ते ३,००० रुपये, आफ्रिकेसाठी ६,००० रुपये आणि युरोपसाठी १०,००० रुपये सरचार्ज असेल. दक्षिण-पूर्व आशिया, GCC, पश्चिम आशिया तसेच उत्तर आणि पूर्व आशियासाठी ५,५०० रुपये सरचार्ज आकारला जाईल.

एप्रिलनंतर दुसऱ्यांदा वाढ

इंडिगोने यापूर्वी एप्रिलमध्ये फ्यूल सरचार्ज वाढवला होता. मार्च २०२६ पासून कंपनीने हा सरचार्ज लागू करण्यास सुरुवात केली. कंपनीच्या म्हणण्यानुसार, अलीकडच्या काळात ATFच्या किमतीत मोठी वाढ झाली आहे. पश्चिम आशियातील वाढत्या भू-राजकीय तणावामुळेही इंधनाच्या किमतीवर परिणाम झाला आहे.

विमान इंधन हा एअरलाइनच्या खर्चातील महत्त्वाचा घटक आहे. त्यामुळे ATF महागल्याने विमान कंपन्यांच्या परिचालन खर्चात वाढ होत आहे. ग्राहकांवरील आर्थिक भार कमी ठेवण्यासाठी सरचार्जमध्ये मर्यादित वाढ करण्यात आल्याचे इंडिगोने स्पष्ट केले. तसेच बाजारातील परिस्थिती आणि इंधनाच्या किमतीवर लक्ष ठेवून भविष्यात आवश्यक बदल केले जातील, असेही कंपनीने म्हटले आहे.