Stock Market : भारतीय शेअर बाजाराने बुधवारी मजबूत कामगिरी नोंदवत सकारात्मक बंद झाला. बीएसई सेंसेक्स आणि एनएसई निफ्टी या दोन्ही निर्देशांकांनी सुमारे 0.5 टक्क्यांनी वाढ नोंदवली. जागतिक बाजारातील सकारात्मक संकेत आणि महागाईच्या आघाडीवर मिळालेल्या दिलासामुळे बाजारात खरेदीचा जोर दिसून आला. जुलै महिन्यात किरकोळ महागाई दर 1.6 टक्क्यांपर्यंत घसरला, जो गेल्या सहा वर्षांतील सर्वात खालचा स्तर आहे. याशिवाय, अमेरिकेतील महागाई दरातही नरमाई दिसून आल्याने व्याजदर कपातीच्या अपेक्षा वाढल्या आहेत. सेंसेक्स आणि निफ्टीची कामगिरी – व्यवहाराच्या शेवटी, बीएसई सेंसेक्स 304.32 अंकांनी म्हणजेच 0.38 टक्क्यांनी वाढून 80,539.91 वर बंद झाला. दुसरीकडे, एनएसई निफ्टी 131.95 अंकांनी म्हणजेच 0.54 टक्क्यांनी उसळी घेत 24,619.35 च्या पातळीवर पोहोचला. सेक्टरनिहाय कामगिरी सेक्टरनिहाय निर्देशांकांमध्ये निफ्टी फार्मा क्षेत्रात 1.7 टक्क्यांची सर्वाधिक तेजी दिसून आली. यानंतर निफ्टी मेटल 1.3 टक्के आणि निफ्टी ऑटो 1.1 टक्क्यांनी वधारले. निफ्टी मीडिया, रियल्टी आणि इन्फ्रा क्षेत्रही सकारात्मक नोंदणीत राहिले. मात्र, एफएमसीजी, पीएसयू बँक आणि ऊर्जा क्षेत्रातील निर्देशांकांमध्ये किरकोळ घसरण झाली. गुंतवणूकदारांची संपत्ती वाढली बीएसईवर सूचीबद्ध कंपन्यांचे एकूण बाजार भांडवल आज 13 ऑगस्ट रोजी 445.51 लाख कोटी रुपयांवर पोहोचले, जे मंगळवारी 12 ऑगस्ट रोजी 443.30 लाख कोटी रुपये होते. यामुळे बाजार भांडवलात सुमारे 2.21 लाख कोटी रुपयांची वाढ झाली. थोडक्यात, गुंतवणूकदारांच्या संपत्तीत 2.21 लाख कोटी रुपयांची भर पडली. सेंसेक्समधील टॉप गेनर्स – सेंसेक्समधील 30 पैकी 22 समभाग आज तेजीसह बंद झाले. यामध्ये भारत इलेक्ट्रॉनिक्स लिमिटेड (बीईएल) च्या समभागांनी 2.25 टक्क्यांची सर्वाधिक वाढ नोंदवली. यानंतर इटर्नल, कोटक महिंद्रा बँक, टाटा मोटर्स आणि महिंद्रा अँड महिंद्रा यांच्या समभागांनी 1.42 ते 2.08 टक्क्यांपर्यंत वाढ दर्शवली. सेंसेक्समधील टॉप लूजर्स – उर्वरित 8 समभाग घसरणीसह बंद झाले. यामध्ये अदानी पोर्ट्सचा समभाग 0.78 टक्क्यांच्या घसरणीसह सर्वात मोठा तोटा सहन करणारा ठरला. याशिवाय आयटीसी, अल्ट्राटेक सिमेंट, टायटन आणि ॲक्सिस बँकेच्या समभागांमध्ये 0.22 ते 0.58 टक्क्यांपर्यंत घसरण दिसून आली. बाजारातील एकूण व्यवहार – बॉम्बे स्टॉक एक्सचेंजवर (बीएसई) आज एकूण 4,246 समभागांमध्ये व्यवहार झाले. यापैकी 2,230 समभाग तेजीसह बंद झाले, तर 1,861 समभाग घसरणीसह बंद झाले. 155 समभाग स्थिर राहिले. याशिवाय, 109 समभागांनी आज 52 आठवड्यांचा नवीन उच्चांक गाठला, तर 104 समभागांनी 52 आठवड्यांचा नवीन नीचांक गाठला.
