Indian Batting Record : भारतीय फलंदाजांनी न्यूझीलंडमध्ये रचला इतिहास! ९४ वर्षांच्या इतिहासात पहिल्यांदाच केला ‘हा’ खास पराक्रम
Indian Batting Record Wellington Test : न्यूझीलंडविरुद्ध वेलिंग्टन येथे सुरु असलेल्या कसोटी सामन्यात भारताच्या पहिल्या पाच फलंदाजांनी एक नवा इतिहास रचला. परदेशी भूमीवर अशी कामगिरी भारतीय संघाने पहिल्यांदाच केली आहे.

Indian Batting Record top five batters create history in Wellington Test : न्यूझीलंडच्या भूमीवर भारतीय फलंदाजांनी अशी काही ऐतिहासिक कामगिरी केली आहे, जी भारतीय कसोटी क्रिकेटच्या इतिहासात यापूर्वी कधीही घडली नव्हती. वेलिंग्टन येथील बेसिन रिझर्व्ह मैदानावर सुरू असलेल्या पहिल्या कसोटी सामन्यात टीम इंडियाच्या पहिल्या पाचही फलंदाजांनी एकाच डावात ५० किंवा त्याहून अधिक धावा करून नवा इतिहास रचला आहे. भारतीय कसोटी क्रिकेटच्या ९४ वर्षांच्या प्रदीर्घ इतिहासात परदेशी भूमीवर अशी कामगिरी करण्याची ही पहिलीच वेळ ठरली आहे.
भारताची पहिल्या डावात भक्कम आघाडी –
यजमान न्यूझीलंडचा पहिला डाव ३६८ धावांवर आटोपल्यानंतर भारतीय फलंदाजांनी सामन्यावर आपली पकड मजबूत केली आहे. तिसऱ्या दिवसाचा खेळ संपला तेव्हा भारताने ४ गडी बाद ४८६ धावांपर्यंत मजल मारली आहे. या डावात सलामीवीर केएल राहुलने दमदार शतक झळकावले, तर यशस्वी जैस्वाल, देवदत्त पडिक्कल, कर्णधार शुबमन गिल आणि यष्टीरक्षक ऋषभ पंत यांनी शानदार अर्धशतके पूर्ण करत संघाला मोठी आघाडी मिळवून दिली.
परदेशी भूमीवर पहिलाच ऐतिहासिक विक्रम –
Stumps on Day 3!
Glorious performances through the batting order take #TeamIndia to a commanding lead 👏
Scorecard ▶️ https://t.co/AfKNPUCjYW
#NZvIND https://t.co/RT39L2r300
— BCCI (@BCCI) November 21, 2026
भारतीय कसोटी इतिहासात एकाच डावात पहिल्या पाच फलंदाजांनी अर्धशतकी खेळी करण्याची ही एकूण पाचवी वेळ आहे. मात्र, यापूर्वीचे चारही विक्रम भारतीय भूमीवर झाले होते, परंतु परदेशात असा पराक्रम प्रथमच घडला आहे. वेलिंग्टन कसोटीत यशस्वी जैस्वालने ८९ चेंडूत ८५ धावा, तर केएल राहुलने २९० चेंडूंचा सामना करत १३६ धावांची संयमी आणि तितकीच निर्णायक शतकी खेळी साकारली.
पडिक्कल, गिल आणि पंतची दिमाखदार फटकेबाजी –
तिसऱ्या क्रमांकावर फलंदाजीला आलेल्या देवदत्त पडिक्कलने १७५ चेंडूत ८० धावा करत आपली उपयुक्तता सिद्ध केली. त्यानंतर कर्णधार शुबमन गिलने आक्रमक पवित्रा घेत शतकाकडे कूच केली, मात्र अवघ्या दोन धावांनी त्याचे शतक हुकले आणि तो ९८ धावांवर बाद झाला. दिवसाच्या शेवटच्या सत्रात ऋषभ पंतनेही ६२ चेंडूत नाबाद ५५ धावा ठोकत या ऐतिहासिक विक्रमावर शिक्कामोर्तब केले.
केएल राहुलने गावस्कर-अमरनाथच्या विक्रमाशी केली बरोबरी –
Another century stand 💪
Another reason for us to smile 😌
Superb batting display, ft. Shubman Gill and Rishabh Pant 🤝
#TeamIndia | #NZvIND | @ShubmanGill | @RishabhPant17 https://t.co/Zsk42F20vr
— BCCI (@BCCI) November 21, 2026
आपल्या १३६ धावांच्या खेळीदरम्यान केएल राहुलने आणखी एक खास विक्रम आपल्या नावावर केला आहे. न्यूझीलंडच्या भूमीवर आपल्या पदार्पणाच्याच कसोटी सामन्याच्या पहिल्या डावात शतक झळकावणारा तो तिसरा भारतीय फलंदाज ठरला आहे. यापूर्वी १९७६ मध्ये ऑकलंडच्या ईडन पार्क मैदानावर सुनील गावस्कर (११६ धावा) आणि सुरिंदर अमरनाथ (१२४ धावा) यांनी अशी कामगिरी केली होती.





