India-US Trade Deal: भारताचे अमेरिकेशी व्यापारी संबंध अधिक बळकट झाले आहेत. भारतीय वस्तूंना अमेरिकन बाजारपेठ प्राधान्यक्रमाने प्रवेश मिळेल अशा प्रकारचा व्यापार करार अमेरिकेबरोबर करण्याचा प्रयत्न करण्यात येत आहे. व्यापाराबरोबरच भारत व अमेरिकेचे संबंध तंत्रज्ञान, संरक्षण, गुंतवणूक क्षेत्रात बळकट होत आहेत, असे केंद्रीय वाणिज्य मंत्री पियुष गोयल यांनी पुन्हा सांगितले. पत्रकारांशी बोलताना ते म्हणाले की, भारत -अमेरिकेदरम्यान होणारा करार इतर देशाबरोबर अमेरिकेने केलेल्या करारापेक्षा जास्त फायदेशीर आहे. कारण अमेरिकेने भारतीय वस्तूवर फक्त 18% आयात कर लावण्याचा प्रस्ताव केला आहे. भारताच्या स्पर्धक देशापेक्षा हा आयात कर कमी आहे, या बाबीकडे त्यांनी लक्ष वेधले. हेही वाचा – महागाईचा भडका उडणार? कच्च्या तेलाच्या किमतीमुळे कर्जाचे हप्ते महागण्याची शक्यता; HSBC चा इशारा भारत ही जगात वेगाने वाढणारी अर्थव्यवस्था आहे व भू- राजकीय तणाव व इतर कारणामुळे जागतिक व्यापारावर काही काळ परिणाम झाला असला तरी लवकरच परिस्थिती सुरळीत होईल. त्यानंतर भारत अधिक वेगाने आगेकूच करू शकेल. त्यामुळे भारतामध्ये परदेशी गुंतवणूकदार गुंतवणूक करण्यास उत्सुक आहेत. अमेरिकामार्गे ही गुंतवणूक भारतात जास्त प्रमाणात आणण्यासाठी भारत प्रयत्न करीत असल्याचे ते म्हणाले. भारत व अमेरिकेने 2 फेब्रुवारी रोजी व्यापार कराराची घोषणा केली. या संदर्भातील संयुक्त निवेदन 7 फेब्रुवारी रोजी जाहीर करण्यात आले. त्यानंतर अमेरिका -इराण युद्ध सुरू झाले. त्यामुळे या आघाडीवर फार चर्चा झाली नाही. मात्र गेल्या आठवड्यात म्हणजे 27 मार्च रोजी गोयल यांनी अमेरिकेच्या व्यापार प्रतिनिधीसोबत जागतिक व्यापार संघटनेच्या अधिवेशनावेळी चर्चा केली आहे. त्या आधारावर भारत अमेरिका करार लवकरच होईल. तो भारतासाठी फायदेशीर राहील असे असे गोयल म्हणाले.
