India Squad Announce : न्यूझीलंड दौऱ्यासाठी भारताचे वनडे आणि कसोटी संघ जाहीर; शमी-भुवनेश्वरला पुन्हा डच्चू, वनडेसाठी दोन वेगळे कर्णधार
India Squad Announce : बीसीसीआयने न्यूझीलंड दौऱ्यासाठी भारताचे एकदिवसीय आणि कसोटी संघ जाहीर केले आहेत. दोन्ही संघांमधून मोहम्मद शमी आणि भुवनेश्वर कुमार यांना वगळण्यात आले आहे.
Shubman Gill and Shreyas Iyer to lead India in New Zealand ODIs BCCI announces squads : बीसीसीआयने न्यूझीलंडविरुद्धच्या आगामी २०२६ दौऱ्यासाठी भारतीय एकदिवसीय आणि कसोटी संघांची अधिकृत घोषणा केली आहे. या दौऱ्यात भारतीय संघ पाच एकदिवसीय आणि दोन कसोटी सामन्यांची मालिका खेळणार आहे. आगामी कसोटी मालिका आणि खेळाडूंच्या कामाचा ताण लक्षात घेऊन बीसीसीआयने पाच सामन्यांच्या वनडे मालिकेसाठी दोन स्वतंत्र संघ जाहीर केले आहेत. पहिल्या तीन सामन्यांचे नेतृत्व शुभमन गिलकडे सोपवण्यात आले असून उर्वरित दोन सामन्यांत श्रेयस अय्यर संघाचे नेतृत्व करणार आहे.
शमी आणि भुवनेश्वर कुमार बाहेर; युवा गोलंदाजांना संधी –
या संघ निवडीतील सर्वात मोठा आणि धक्कादायक निर्णय म्हणजे अनुभवी वेगवान गोलंदाज मोहम्मद शमी आणि भुवनेश्वर कुमार यांना दोन्ही फॉरमॅटमधून वगळण्यात आले आहे. माजी मुख्य निवडकर्ते अजित आगरकर यांच्यानंतर या दिग्गजांचे पुनरागमन होईल अशी चर्चा होती. मात्र निवड समितीने भविष्याचा विचार करत मोहम्मद सिराज, प्रसिध कृष्णा, अर्शदीप सिंग यांच्यासह अंशुल कंबोज आणि गुरनूर ब्रार या युवा गोलंदाजांवर विश्वास दाखवला आहे, तर जसप्रीत बुमराहचा समावेश केवळ कसोटी संघात करण्यात आला आहे.
इशान किशनला मिळाली मोठी जबाबदारी –
🚨 News 🚨
#TeamIndia’s ODI and Test squads for New Zealand tour announced 📝
Captain Shubman Gill will lead the side for the first 3️⃣ ODIs, before Shreyas Iyer takes charge for the last 2️⃣ matches.
More details ▶️ https://t.co/npwxUYlb1N
#NZvIND https://t.co/3ckm7ixgEN
— BCCI (@BCCI) October 16, 2026
वनडे संघ निवडीचे दुसरे मोठे वैशिष्ट्य म्हणजे यष्टीरक्षक फलंदाज इशान किशनला मिळालेली नवी जबाबदारी होय. मालिकेतील चौथ्या आणि पाचव्या वनडे सामन्यासाठी कर्णधार श्रेयस अय्यरच्या साथीला इशान किशनला भारतीय संघाचा उपकर्णधार बनवण्यात आले आहे. आंतरराष्ट्रीय क्रिकेटमध्ये पुनरागमन करणाऱ्या इशानसाठी ही मोठी संधी मानली जात आहे. तसेच वनडे संघात नमन धीर, नितीश कुमार रेड्डी, आकिब नबी, यश ठाकूर आणि कुमार कुशाग्र अशा युवा खेळाडूंनाही संधी देण्यात आली आहे.
कसोटी संघाचे नेतृत्व शुबमन गिलकडे; केएल राहुल उपकर्णधार
न्यूझीलंडविरुद्धच्या महत्त्वाच्या कसोटी मालिकेसाठी शुबमन गिलकडे कर्णधारपद सोपवण्यात आले असून केएल राहुल उपकर्णधार असेल. कसोटी संघात यशस्वी जैस्वाल, देवदत्त पडिक्कल, ऋषभ पंत, ध्रुव जुरेल, रवींद्र जडेजा, वॉशिंग्टन सुंदर आणि कुलदीप यादव यांचा समावेश आहे. जागतिक कसोटी अजिंक्यपद स्पर्धेची अंतिम फेरी गाठण्यासाठी ही कसोटी मालिका अत्यंत निर्णायक असल्याने भारताने आपला सर्वात मजबूत संघ मैदानात उतरवला आहे.
