भारताला खुणावतोय मालिका विजय; न्यूझीलंडविरुद्ध उद्या रंगणार दुसरा एकदिवसीय सामना
रायपूर – पहिल्या सामन्यात अखेरच्या क्षणी शार्दूल ठाकूरने केलेल्या अफलातून गोलंदाजीच्या जोरावर विजयी ठरलेल्या भारतीय संघाला आज येथे होत असलेला न्यूझीलंडविरुद्धचा दुसरा सामना जिंकून मालिकाही खिशात टाकण्याची संधी आहे. पहिल्या सामन्यात साडेतीनशे धावा करूनही भारतीय संघ पराभवाच्या छायेत होता. त्यावेळी मायकल ब्रेसवेलला ठाकूरने यॉर्कर चेंडूवर पायचित केले व भारताने हा सामान अवघ्या 12 धावांनी जिंकला.
#Rahul Dravid । राहुल द्रविडच्या मुलाला क्रिकेटमध्ये मोठं यश; बनला ‘या’ संघाचा कर्णधार
या दोन संघात सुरू असलेल्या तीन एकदिवसीय सामन्यांच्या मालिकेत भारतीय संघाने 1-0 अशी आघाडी घेतली असून, शनिवारचाही सामना जिंकत तिसऱ्या सामन्यापूर्वीच ही मालिकाही जिंकण्यासाठी त्यांना संघात काही बदल करावे लागणार आहेत. ठाकूरने चांगली गोलंदाजी केली असली तरीही न्यूझीलंडची भक्कम फलंदाजी पाहता संघात उमरान मलिक असणे अत्यंत गरजेचे आहे. शाहबाज अहमद, श्रीकर भरत तसेच रजत पाटीदार व यजुवेंद्र चहल यांना रोटेशननुसार संधी मिळेल, असेही संकेत देण्यात आले आहेत.
भारतीयांचा श्रीलंकेविरुद्धच्या तीन एकदिवसीय सामन्यांच्या मालिकेत निर्विवाद विजय मिळवल्यावर आत्मविश्वास दुणावला होता. त्यामुळे पहिल्या सामन्यात त्यांनी न्यूझीलंडच्या जवळपास सर्वच गोलंदाजांवर वर्चस्व राखले व त्रिशतकी धावांचे आव्हान उभे केले. सलामीवीर फलंदाज शुभमन गिल याने विक्रमी द्विशतकी खेळी केली होती. मात्र, कर्णधार रोहित शर्मासह अन्य कोणत्याही फलंदाजाला मोठी खेळी करता आली नाही.
रोहितसह विराट कोहली, ईशान किशन, सूर्यकुमार यादव व हार्दिक पंड्या यांनी थोडी चमक दाखवली. मात्र, न्यूझीलंडचाही संघ तुल्यबळ असल्याने त्यांना जास्त सरस खेळ करावा लागणार आहे. अनुभवी महंमद शमीसह महंमद सिराज यांच्यासह आता उमरान मलिक याच्यावरच भारताची मदार राहणार आहे. पहिल्या सामन्यात मोठी धावसंख्या उभारल्यावरही भारतीय संघाला ब्रेसवेलकडून चांगलाच धोका होता. मात्र, ठाकूरने त्याला बाद केले व भारताने हा सामना आश्चर्यकाररीत्या जिंकला.
ब्रेसवेलने 140 धावांची खेळी केली होती. या अखेरच्या षटकात त्यांना 6 चेंडूंत 21 धावांची गरज होती. ब्रेसवेलने पहिल्याच चेंडूवर षटकार खेचला होता. मात्र, त्यानंतर तो बाद झाला व सामना भारताने जिंकला. ब्रेसवेलचा अनुभव कमी पडल्याने त्यांना पराभव स्वीकारावा लागला होता. दुसरीकडे न्यूझीलंडचा संघ भरात आहे. टॉम लॅथम स्वप्नवत फॉर्ममध्ये असून त्याच्यासह ब्रेसवेल डेव्हन कॉनवे, हेनरी निकोलस, डॅरेल मिशेल यांना लवकर बाद करण्यात भारतीय गोलंदाजांना यश आले तरच त्यांना विजयाची संधी आहे.
उमरान अस्त्र ठरेल
भारतीय संघाचा वेगवान गोलंदाज उमरान मलिकला या लढतीत खेळवणार असल्याचे संकेत मिळत आहेत. शार्दूल ठाकूरच्या जागी त्याची वर्णी लागू शकते. त्यातच या मैदानावरील खेळपट्टी नव्याने तयार करण्यात आल्याने ती टणक आहे, त्यामुळे उमरानच्या वेगवान चेंडूंचा सामना करणे न्यूझीलंडच्या फलंदाजांसाठी आव्हान ठरेल. त्यातच भारतात हिवाळा असल्याने चेंडूला स्विंगही मिळेल. त्यामुळे कर्णधार रोहित उमरानला जास्त पसंती देणार, असेच सध्या चित्र दिसत आहे.
