दुबई – भारताकडून पाकिस्तानवर पुन्हा एकदा “सर्जिकल स्ट्राइक’ केला जाणार असल्याचा दावा पाकिस्तानचे परराष्ट्र मंत्री शाह मोहम्मद कुरेशी यांनी केला आहे. याबाबतचे ठोस पुरावेही आपल्याजवळ असल्याचे कुरेशी यांचे म्हणणं आहे. दरम्यान, भारतीय लष्कराने या सर्व शक्‍यता पूर्णपणे फेटाळून लावल्या आहेत.

दुबईत एका पत्रकार परिषदेत कुरेशी बोलत होते. पाकिस्तानच्या गुप्तचर यंत्रणेने भारताकडून सर्जिकल स्ट्राइक केला जाण्याचा इशारा दिला असल्याचे कुरेशी म्हणाले. पाकिस्तानचे परराष्ट्र मंत्री दोन दिवसांच्या दुबई दौ-याच्या अखेरच्या दिवशी त्यांनी माध्यमांशी संवाद साधला.

पाकिस्तानवर “सर्जिकल स्ट्राइक’ची तयारी भारताकडून केली जात असल्याची मोठी माहिती आमच्या गुप्तचर यंत्रणेनी दिली आहे. भारताने आपल्या व्यापारी मित्र देशांकडून या हल्ल्याबाबतची सहमती घेण्यासही सुरुवात केली आहे, असे कुरेशी म्हणाले.
देशांतर्गत मुद्यांवरून जनतेचे लक्ष वळवण्यासाठी या सर्जिकल स्ट्राइकच्या रणनीती आखली गेल्याचाही आरोप त्यांनी केला आहे.

दरम्यान, गुप्तचर यंत्रणेने दिलेल्या इशाऱ्यानुसार पाक लष्कराला हायअलर्ट देण्यात आल्याचे वृत्त पाकिस्तानच्या ‘डॉन’ या वृत्तपत्राने दिले आहे. पाकिस्तानी माध्यमांमध्ये भारताकडून हल्ला होण्याची शक्‍यता असल्याचं वृत्त गेल्या अनेक दिवसांपासून चालवले जात आहे. भारतीय लष्कर प्रत्यक्ष नियंत्रण रेषा ओलांडून सर्जिकल स्ट्राइक करण्याच्या प्रयत्नात असल्याचं वृत्त ‘डॉन’ने सुत्रांच्या हवाल्यानं दिलं होतं.