Russian President Vladimir Putin – रशियाचे राष्ट्राध्यक्ष व्लादिमीर पुतिन यांनी पुन्हा एकदा पंतप्रधान नरेंद्र मोदी यांच्या नेतृत्वाचे कौतुक केले आहे. ‘स्वतंत्र’ परराष्ट्र धोरण अवलंबण्याचे श्रेय त्यांनी भारताला दिले. पुतीन म्हणाले की, आजच्या जगात ही गोष्ट सोपी नाही. रशियन मीडिया नेटवर्क रशिया टुडे (आरटी) ने पुतीन यांच्या हवाल्याने आपल्या अहवालात ही माहिती दिली आहे.

वृत्तानुसार, पुतिन हे गुरुवारी ‘रशियन विद्यार्थी दिना’च्या निमित्ताने कॅलिनिनग्राड भागातील विद्यापीठातील विद्यार्थ्यांशी संवाद साधत होते. संभाषणादरम्यान अध्यक्ष पुतिन म्हणाले, “सध्या भारताचा आर्थिक विकास आणि विकास दर जगात सर्वाधिक आहे. हे सध्याचे पंतप्रधान (नरेंद्र मोदी) यांच्या नेतृत्व क्षमतेमुळे आहे. त्यांच्या नेतृत्वाखाली भारताने हा वेग गाठला आहे.”

पुतिन म्हणाले, “आमचा देश भारतावर आणि त्याच्या नेतृत्वावर विश्वास ठेवू शकतो. यामागे एक कारण आहे. खरं तर, आंतरराष्ट्रीय मंचावर भारत कधीही रशियाविरुद्ध खेळ करणार नाही, असा आम्हाला विश्वास आहे. भारत स्वतंत्र परराष्ट्र धोरण अवलंबत आहे, जे आजच्या जगात सोपे नाही. दीड अब्ज लोकसंख्या असलेल्या भारताला तसे करण्याचा सर्व अधिकार आहे आणि पंतप्रधानांच्या नेतृत्वाखाली तो अधिकार अंमलात आणला जात आहे. पुतीन म्हणाले, हे काही ढोंग नाही. आमच्या एकत्र काम करण्याच्या दृष्टिकोनातून हे महत्त्वाचे आहे. यामुळे आम्ही असा अंदाज लावू शकतो की, दीर्घकाळ आमचे भागीदार कसे वर्तन करत आहेत.”

भारत आणि रशिया यांच्यातील अनेक दशकांच्या जुन्या संबंधांचा उल्लेख करताना पुतिन म्हणाले की, दोन्ही देशांनी नेहमीच एकमेकांवर विश्वास ठेवला आहे आणि गरजेच्या वेळी एकमेकांना साथ दिली आहे. यापूर्वीही दोन्ही देशांमध्ये चांगले संबंध होते आणि आजही आमचे चांगले संबंध आहेत. रशियाच्या राष्ट्राध्यक्षांनी मोदी सरकारच्या योजनांचे विशेषत: ‘मेक इन इंडिया’चे कौतुक केले. ते म्हणाले, पंतप्रधान मोदींच्या नेतृत्वाखाली ‘मेक इन इंडिया’ मोठ्या प्रमाणावर यश मिळवत आहे आणि आपला देश सर्वात मोठा विदेशी गुंतवणूकदार बनून भारतावर विश्वास दाखवत आहे.

पुतीन म्हणाले की, आम्ही आमच्या भारतीय मित्रांसह या सर्व योजना साकारण्याचा प्रयत्न करत आहोत. भारतात सर्वात जास्त विदेशी गुंतवणूक रशियातून आली आहे. तेल शुद्धीकरण प्रकल्प, गॅस स्टेशनचे जाळे, बंदर इत्यादींच्या अधिग्रहणासाठी आमच्या कंपनी रोझनेफ्टने 23 अब्ज अमेरिकन डॉलर्सची गुंतवणूक केली होती. भारतातील वैविध्यपूर्ण संस्कृती आणि रशियामध्ये भारतीय चित्रपटांच्या लोकप्रियतेबद्दलही त्यांनी सांगितले. रशियन राष्ट्राध्यक्ष म्हणाले की, भारत हा महान संस्कृती असलेला देश आहे. हे वैविध्यपूर्ण आहे. रशिया कदाचित जगातील अशा काही ठिकाणांपैकी एक आहे जिथे भारतीय चित्रपट राष्ट्रीय दूरचित्रवाणीवर दाखवले जातात.

15 जानेवारी रोजी रशियाचे राष्ट्राध्यक्ष व्लादिमीर पुतिन आणि पंतप्रधान नरेंद्र मोदी यांच्यात फोनवर चर्चा झाली होती. त्यांनी भविष्यात वैयक्तिक संपर्क ठेवण्याचे मान्य केले आणि आपापल्या देशातील आगामी राष्ट्रपती आणि संसदीय निवडणुकांमध्ये एकमेकांना यश मिळावे यासाठी शुभेच्छा दिल्या. परराष्ट्र मंत्री एस. जयशंकर यांच्या रशिया दौऱ्यानंतर काही आठवड्यांनंतर पुतिन आणि मोदी यांनी दूरध्वनीवरून चर्चा केली. जयशंकर यांच्या भेटीदरम्यान, दोन्ही देशांनी आधुनिक शस्त्रास्त्रांच्या निर्मितीसह लष्करी आणि तांत्रिक सहकार्य वाढवण्याचा निर्णय घेतला. पुतीन आणि मोदी यांच्यातील चर्चेनंतर क्रेमलिन (रशियन राष्ट्राध्यक्षांचे कार्यालय) म्हणाले, “दोन्ही बाजूंनी वैयक्तिक संबंध सुरू ठेवण्यास सहमती दर्शविली.”