Duleep Trophy 2024 : ऋतुराज ठरला श्रेयसवर भारी; भारत ‘क’ संघाचा ‘ड’ संघावर दणदणीत विजय…
Duleep Trophy 2024 (IND C vs IND D Match) : आंध्र प्रदेशातील अनंतपूर येथे खेळल्या गेलेल्या दुलीप ट्रॉफी सामन्यात भारत-क संघाने भारत-ड संघाचा 4 गडी राखून पराभव केला आहे. सामन्याच्या तिसऱ्या दिवशी भारत-क संघाने विजयासाठीचे 233 धावांचे लक्ष्य 6 गडी गमावून पूर्ण केले. या विजयासह भारत-क चे 6 गुण झाले आहेत.
पहिल्या दिवशी, भारत-क च्या गोलंदाजांनी चमकदार कामगिरी केली आणि भारत-ड चा संपूर्ण संघ 164 धावांवर गुंडाळला. यानंतर दिवसाचा खेळ संपेपर्यंत भारत क संघाने 4 गड्यांच्या मोबदल्यात 49 धावा केल्या होत्या. मात्र, भारत क संघाची दुसऱ्या दिवशी चांगली सुरुवात झाली नाही आणि संघाला 97 धावसंख्येवर अभिषेक पोरलच्या रूपाने पाचवा धक्का बसला. यानंतर विकेट पडण्याची प्रक्रिया सुरूच राहिली आणि भारत-क 168 धावांवर गडगडला.
भारत-क ने नाणेफेक जिंकून भारत-ड ला प्रथम फलंदाजीसाठी आमंत्रित केले होते. भारत ड संघ पहिल्या डावात अवघ्या 164 धावांत सर्वबाद झाला होता प्रत्युत्तरात भारत-क संघही पहिल्या डावात मोठी धावसंख्या उभारू शकला नाही आणि 168 धावांत सर्वबाद झाला. त्यानंतर भारत-ड संघ दुस-या डावात केवळ 236 धावा करू शकला आणि भारत-क संघासमोर 233 धावांचे लक्ष्य ठेवले होते, ज्याचा पाठलाग करताना भारत-क संघाचा डावही गडगडला.
𝐕𝐢𝐜𝐭𝐨𝐫𝐲 𝐟𝐨𝐫 𝐈𝐧𝐝𝐢𝐚 𝐂! 🙌
Abishek Porel (35*) and Manav Suthar (19*) hold their nerve to take India C past the finish line. They win by 4 wickets 👏
What an exciting roller-coaster of a match 🔥#DuleepTrophy | @IDFCFIRSTBank
Scorecard ▶️ https://t.co/PcAyYzIC6z pic.twitter.com/4eUCQUBrK5
— BCCI Domestic (@BCCIdomestic) September 7, 2024
भारत-क ने 191 धावांवर 6 विकेट गमावल्या होत्या, परंतु युवा फलंदाज अभिषेक पोरेल आणि मानव सुथार यांनी संयमी खेळ करत आणखी विकेट पडू दिल्या नाहीत आणि दोघांनीही शेवटपर्यंत टिकून राहून संघाला विजय मिळवून दिला. पोरेलने नाबाद 35, तर मानवने 19 धावा केल्या. दोघांमध्ये सातव्या विकेटसाठी 42 धावांची विजयी भागीदारी झाली. तर त्याआधी ऋतुराज गायकवाडने जलदगतीने म्हणजेच 48 चेंडूत 46 धावांची खेळी केली, ज्यामुळे संघाच्या विजयात मदत झाली. त्यांच्याशिवाय आर्यन जुयाल याने 47 तर रजत पाटीदार याने 44 धावांची महत्वपूर्ण खेळी केली.
मानव सुथार ठरला सामनावीर…
भारत ‘क’ संघाकडून खेळताना युवा फिरकीपटू मानव सुथारने या सामन्यात अप्रतिम कामगिरी केली. सुथारला भारत-क विरूध्दच्या सामन्यातील पहिल्या डावात 1 बळी मिळवण्यात यश आले होते मात्र त्यानंतर त्यानं कामगिरीत सुधारणा करत दुसऱ्या डावात 7 विकेट्स घेत आपल्या संघाच्या विजयात मोलाचं योगदान दिले. मानव सुथारने दुसऱ्या डावात 19.1 षटकांत 49 धावांत 7 बळी घेतले. आश्चर्याची गोष्ट म्हणजे या काळात त्याने 7 षटके निर्धाव टाकली. या सामन्यात सुथारने श्रीकर भरतला दोनदा बाद केले. याशिवाय त्याने देवदत्त पडिक्कल, रिकी भुई, अक्षर पटेल यांसारख्या मोठ्या खेळाडूंच्या विकेट्स घेतल्या.
