India Beat Pakistan : भारताने पाकिस्तानचा धुव्वा उडवत नोंदवली विजयाची हॅट्ट्रिक! हरमनप्रीत कौरने षटकाराने संपवला सामना
India Beat Pakistan : भारतीय महिला संघाने आशिया कपमध्ये पाकिस्तानचा धुव्वा उडवत विजयाची हॅट्ट्रिक नोंदवली आहे. विशेष म्हणजे यापूर्वीच भारतीय संघाने उपांत्य फेरीत स्थान पक्के केले आहे.
India Beat Pakistan By 7 Wickets Womens Asia Cup 2026 Harmanpreet Kaur Six Strike : महिला आशिया चषक २०२६ (Women’s Asia Cup 2026) स्पर्धेत भारतीय महिला संघाने कट्टर प्रतिस्पर्धी पाकिस्तानचा ७ गडी राखून धुव्वा उडवला. दुबई आंतरराष्ट्रीय स्टेडियमवर खेळवण्यात आलेल्या या सामन्यात भारताने पाकिस्तानला तब्बल ६८ चेंडू शिल्लक ठेवून धूळ चारली. नाणेफेक जिंकून प्रथम फलंदाजी करताना पाकिस्तानचा संपूर्ण संघ १८.१ षटकांत अवघ्या ५५ धावांवर गारद झाला, ज्याचा पाठलाग भारताने ८.४ षटकांत सहज पूर्ण केला. या विजयासह भारताने स्पर्धेत विजयाची शानदार हॅटट्रिक साजरी केली आहे.
२७ धावांवरून ५५ वर ऑल आऊट; पाकिस्तानचा पत्त्यांसारखा कोसळला डाव –
सलामीवीर मुनिबा अली (१३) आणि शवाल जुल्फिकार (१४) यांनी ४.३ षटकांत २७ धावांची भागीदारी करून बऱ्यापैकी सुरुवात केली होती. मात्र, मुनिबा बाद होताच भारतीय फिरकीपुढे पाकिस्तानने नांगी टाकली. अवघ्या २९ धावांवर ३ विकेट्स गमावल्यानंतर ३५ धावांत त्यांचे ६ फलंदाज पॅव्हेलियनमध्ये परतले होते. श्री चरणीने ७ धावांत ३ विकेट्स, प्रेमा रावतने ९ धावांत ३ विकेट्स आणि दीप्ती शर्माने ५ धावांत २ विकेट्स घेत पाकिस्तानला ५५ धावांत गुंडाळले.
She starred with the ball, set the tone for #TeamIndia‘s third successive win & for that, Sree Charani bags the Player of the Match award 👏 👏
Scorecard ▶️ https://t.co/1WHHWPMe2o#WomensAsiaCup pic.twitter.com/cCIf6YkiCm
— BCCI Women (@BCCIWomen) September 5, 2026
फातिमा सनाचा पावरप्लेमध्ये धक्का; भारताने गमावले ३ महत्त्वाचे मोहरे!
५६ धावांच्या छोट्या आव्हानाचा पाठलाग करताना शफाली वर्माने डावाच्या पहिल्याच चेंडूवर षटकार ठोकून आक्रमक सुरुवात केली. मात्र, पाकिस्तानची कर्णधार फातिमा सनाने दुसऱ्या षटकात एकापाठोपाठ शफाली (१२) आणि प्रतिका रावल (४) यांना बाद करत भारताला धक्के दिले. त्यानंतर स्मृती मानधनाही ९ धावांवर फातिमाचाच शिकार बनली. त्यामुळे अवघ्या काही धावांत भारताचे ३ आघाडीचे फलंदाज बाद झाले.
हरमनप्रीतचा विजयी षटकार; दीप्ती शर्मासोबत केली विजयी भागीदारी –
What an awesome win over Pakistan with a huge six from Harmanpreet’s bat 🏏🏏 🇮🇳🇮🇳 pic.twitter.com/HwwaTNFmGK
— Ashish Kummaar Singh (@AshishSinghLIVE) September 5, 2026
सुरुवातीच्या पडझडीनंतर कर्णधार हरमनप्रीत कौर आणि दीप्ती शर्मा यांनी संयमी फलंदाजी करत सामन्यावर नियंत्रण मिळवले. अखेर कर्णधार हरमनप्रीत कौरने १८ चेंडूंत १८ धावा करताना विजयी षटकार खेचून दिमाखात सामना संपवला. दीप्ती शर्माने १२ धावांची नाबाद खेळी करत तिला उत्तम साथ दिली. सलग तिसऱ्या विजयासह भारताने गुणतालिकेतील अव्वल स्थान अधिक भक्कम केले आहे. आता उपांत्य फेरीत कोणाशी सामना होतो? पाहणे महत्त्वाचे ठरणार आहे.
