Indian Junior Women Hockey Team Beat China Win Asia Cup 2026 Title Hat Trick : भारतीय कनिष्ठ (ज्युनिअर) महिला हॉकी संघाने चीनच्या हुलुनबुइर शहरात अद्वितीय पराक्रम गाजवत नवा इतिहास लिहिला आहे. ‘एएचएफ महिला ज्युनिअर आशिया चषक २०२६’ (Women’s Junior Asia Cup 2026) स्पर्धेच्या अत्यंत अटीतटीच्या अंतिम सामन्यात भारताने यजमान चीनचा १-० असा पराभव केला. या रोमहर्षक विजयासह भारतीय संघाने सलग तिसऱ्यांदा ज्युनिअर आशिया चषकावर आपले नाव कोरत जेतेपदाची ऐतिहासिक हॅटट्रिक पूर्ण केली. या विजयामुळे भारताने आगामी ‘एफआयएच’ महिला ज्युनिअर हॉकी विश्वचषकाचे तिकीटही निश्चित केले आहे.

सानिका चंद्रकांत मानेचा ‘गोल्डन गोल’; १७ व्या मिनिटाला उडवला थरार –

अंतिम सामन्यात स्थानिक प्रेक्षकांच्या प्रचंड पाठिंब्यासह मैदानात उतरलेल्या चिनी संघाला भारतीय खेळाडूंनी चोख प्रत्युत्तर दिले. सामन्याच्या दुसऱ्या क्वार्टरमध्ये, १७ व्या मिनिटाला स्ट्रायकर सानिका चंद्रकांत मानेने अप्रतिम मैदानी गोल (Field Goal) डागून भारताला १-० अशी महत्त्वपूर्ण आघाडी मिळवून दिली. चिनी बचावफळी आणि गोलकीपरला चकवून सानिकाने नोंदवलेला हा शानदार गोल संपूर्ण सामन्यातील एकमेव आणि जेतेपदाचा निर्णायक ‘गोल्डन गोल’ ठरला.

भारतीय बचावाची अभेद्य भिंत; चीनचे सर्व आक्रमक मनसुबे उधळले –

𝗔 𝗪𝗘𝗟𝗟-𝗗𝗘𝗦𝗘𝗥𝗩𝗘𝗗 𝗥𝗘𝗪𝗔𝗥𝗗! 🏆🇮🇳

Hockey India rewards the Indian Junior Women’s Team for their title-winning campaign at the AHF Junior Asia Cup 2026!

₹3 lakh to each player and ₹1.5 lakh to each of the support staff. 🥇🔥

The title win also confirms a spot… pic.twitter.com/CO5kP3pFJP

— Hockey India (@TheHockeyIndia) September 13, 2026

एका गोलने पिछाडीवर पडल्यानंतर यजमान चिनी खेळाडूंनी बरोबरी साधण्यासाठी प्रचंड आक्रमक चढाया केल्या. मात्र, भारताच्या बचावफळीने आणि गोलकीपरने संयमी खेळ करत चिनी आक्रमकांसमोर अभेद्य भिंत उभी केली. चीनने गोलपोस्टवर केलेले सर्व हल्ले भारताने हाणून पाडले. अखेरच्या शिटीपर्यंत भारताने आघाडी टिकवून ठेवत चिनी प्रेक्षकांसमोर देशाचा तिरंगा अभिमानाने फडकवला आणि आशियाई जेतेपदावर आपली मोहोर उमटवली.

हेही वाचा – Elena Rybakina Winner : देश बदलला अन् नशीब फळफळले! एलेना रायबाकिनाने जिंकले यूएस ओपनचे जेतेपद, सबालेन्काला चारली धूळ

हॉकी इंडियाकडून बक्षीसांचा पाऊस; खेळाडूंना प्रत्येकी ३ लाखांचे इनाम –

या ऐतिहासिक जेतेपदानंतर हॉकी इंडियाने (Hockey India) युवा खेळाडूंवर कौतुकाचा आणि बक्षीसांचा वर्षाव केला आहे. विजेत्या संघातील प्रत्येक खेळाडूला ३ लाख रुपयांचे रोख बक्षीस, तर सपोर्ट स्टाफमधील प्रत्येक सदस्याला १.५ लाख रुपयांची प्रोत्साहनपर रक्कम जाहीर करण्यात आली आहे. चीनच्या भूमीवर सलग तिसऱ्यांदा विजेतेपद राखणाऱ्या युवा खेळाडूंच्या लढाऊ वृत्तीचे देशभरातून कौतुक होत असून आता संघाचे लक्ष ज्युनिअर विश्वचषकात पदक जिंकण्यावर केंद्रित झाले आहे.