Vehicle sales : देशातील वाहन बाजाराच्या किरकोळ विक्रीत ऑक्टोबर २०२६ मध्ये मोठी घट नोंदवण्यात आली आहे. फेडरेशन ऑफ ऑटोमोबाइल डीलर्स असोसिएशन (FADA) च्या आकडेवारीनुसार, गेल्या वर्षीच्या ऑक्टोबरच्या तुलनेत यंदा वाहन विक्री २३.८ टक्क्यांनी घसरून सुमारे ३१.७२ लाख वाहनांवर आली. दुचाकी आणि प्रवासी वाहनांच्या विक्रीतील घट यामागील प्रमुख कारण ठरले. मात्र, इलेक्ट्रिक वाहनांच्या विक्रीने नवा उच्चांक गाठला असून एकूण विक्रीतील त्यांचा वाटा ११.५ टक्क्यांवर पोहोचला आहे.

दुचाकी आणि कार विक्रीत घट –
ऑक्टोबरमध्ये दुचाकींच्या किरकोळ विक्रीत २८.३५ टक्क्यांची घट झाली. या महिन्यात २३.२१ लाख दुचाकींची विक्री झाली. प्रवासी वाहनांची विक्रीही ४.२३ टक्क्यांनी कमी होऊन ५.०८ लाखांवर आली. ग्रामीण भागात दुचाकींची विक्री ३३.९७ टक्क्यांनी, तर शहरी भागात २०.७७ टक्क्यांनी घसरली.

सणांच्या तारखांचा विक्रीवर परिणाम –
FADA च्या मते, यंदा वाहन विक्रीतील घसरण ही बाजारातील मागणी कमी झाल्यामुळे नसून सणांच्या तारखांमध्ये झालेल्या बदलामुळे आहे. गेल्या वर्षी नवरात्र आणि दिवाळी ऑक्टोबरमध्येच होती. तसेच २२ सप्टेंबर २०२५ रोजी जीएसटी दर कमी झाल्यानंतर बाजारात वाहनांची मागणी वाढली होती. यंदा नवरात्र ऑक्टोबरमध्ये, तर धनत्रयोदशी आणि दिवाळी नोव्हेंबरमध्ये आल्याने ऑक्टोबरमधील विक्रीवर परिणाम झाला.

FADA चे अध्यक्ष साई गिरिधर यांनीही मागील वर्षीचा ऑक्टोबर हा वाहन विक्रीसाठी विशेष चांगला महिना होता, असे स्पष्ट केले. त्यामुळे यंदाच्या आकडेवारीची तुलना करताना सणांचे वेळापत्रक लक्षात घेणे आवश्यक असल्याचे त्यांनी सांगितले.

इलेक्ट्रिक वाहनांचा वाटा ११.५ टक्क्यांवर –
एकीकडे पारंपरिक वाहनांच्या विक्रीत घट झाली असताना इलेक्ट्रिक वाहनांच्या विक्रीने मात्र विक्रमी कामगिरी केली. ऑक्टोबरमध्ये सुमारे ३.५५ लाख इलेक्ट्रिक वाहनांची विक्री झाली. एकूण वाहन विक्रीतील त्यांचा वाटा ११.५ टक्क्यांवर पोहोचला. गेल्या वर्षी याच काळात हा वाटा सुमारे ६ टक्के होता.

विशेष म्हणजे, सीएनजी, हायब्रीड आणि इलेक्ट्रिक वाहनांचा एकत्रित वाटा ४१.८३ टक्के झाला. तर पेट्रोल वाहनांचा वाटा ४१.६ टक्के नोंदवण्यात आला.

व्यावसायिक वाहने आणि ट्रॅक्टरची विक्री वाढली –
सर्वच वाहन प्रकारांच्या विक्रीत घट झाली असे नाही. ऑक्टोबरमध्ये व्यावसायिक वाहनांची विक्री २.२९ टक्क्यांनी वाढून १.१५ लाखांवर पोहोचली. तीनचाकी वाहनांची विक्री ३.९७ टक्क्यांनी वाढून १.४१ लाख, तर ट्रॅक्टरची विक्री ३.१० टक्क्यांनी वाढून ७९ हजार २८५ झाली. बांधकाम क्षेत्रात वापरल्या जाणाऱ्या वाहनांची विक्रीही २२.०७ टक्क्यांनी वाढून ७ हजार ४३४ वर गेली.

FADA च्या मते, सप्टेंबरच्या तुलनेत ऑक्टोबरमधील वाहन विक्रीत २५ टक्क्यांची वाढ झाली आहे. धनत्रयोदशी ६ नोव्हेंबरला आणि दिवाळी ८ नोव्हेंबरला असल्याने नोव्हेंबरमध्ये वाहन विक्रीला आणखी चालना मिळण्याची शक्यता आहे. मात्र, डिसेंबर आणि जानेवारीतील विक्री नवीन वाहनांचे मॉडेल, कंपन्यांच्या सवलती आणि वाहनांच्या उपलब्धतेवर अवलंबून असेल.