इंदापूर : विद्या प्रतिष्ठान पॉलिटेक्निक कॉलेज, इंदापूरमध्ये ग्रामीण विद्यार्थ्यांना रोजगारक्षम आणि कौशल्याधारित शिक्षण देण्यात येत आहे. एम.के.सी.एल.च्या ‘I-Like’ ट्रेनिंग सेंटरमार्फत विद्यार्थ्यांना मोफत क्रेडिट बेस्ड कोर्सेस दिले जात असून, हे कोर्सेस अकॅडमिक बँक ऑफ क्रेडिट्समध्ये नोंदवले जातात. यामुळे विद्यार्थ्यांचे शैक्षणिक आणि औद्योगिक भवितव्य उज्ज्वल होत आहे, अशी माहिती प्राचार्य डॉ. सुजय देशपांडे यांनी दिली. 21 मे रोजी आयोजित पत्रकार परिषदेत कॉलेजच्या शैक्षणिक, सामाजिक आणि औद्योगिक उपक्रमांची माहिती देण्यात आली. ‘आचार्य चाणक्य कौशल्य विकास केंद्रा’मार्फत सध्या सीएनसी प्रोग्रामिंग आणि पीसीबी मेकिंग हे मोफत कोर्सेस सुरू आहेत. या कोर्सेसद्वारे 100 हून अधिक विद्यार्थ्यांनी प्रात्यक्षिकांद्वारे कौशल्य आत्मसात केले असून, जिल्हा कौशल्य केंद्रामार्फत त्यांना नोकरीसाठी सहाय्य केले जाते. कॉलेजमधील जर्मन भाषा कोर्समुळे ग्रामीण विद्यार्थ्यांना जर्मनीत शिष्यवृत्ती आणि नोकरीच्या संधी उपलब्ध होत आहेत. हा कोर्स आंतरराष्ट्रीय करिअरच्या दृष्टीने विद्यार्थ्यांना तयार करतो. याचा लाभ घेण्याचे आवाहन प्राचार्यांनी केले आहे. सामाजिक बांधिलकी आणि ड्रोन प्रशिक्षण – कॉलेजने सायबर क्राइम विश्लेषणासाठी इंदापूर पोलिसांसोबत पुढाकार घेतला आहे. मशीन लर्निंगद्वारे डेटा विश्लेषण करून संशोधन केंद्राला माहिती पुरवली जाणार आहे. तसेच, गरुडा एरोस्पेससोबत सामंजस्य करार करून लवकरच ड्रोन पायलट ट्रेनिंग सेंटर सुरू होणार आहे. यामुळे स्थानिक विद्यार्थ्यांना अत्याधुनिक प्रशिक्षणाची संधी मिळण्याची शक्यता आहे.
