IND vs SL : बीसीसीआयने आज, २८ जुलै २०२६ रोजी श्रीलंकेविरुद्ध होणाऱ्या आगामी दोन सामन्यांच्या कसोटी मालिकेसाठी भारतीय संघाची (IND vs SL) घोषणा केली आहे. या मालिकेमध्ये भारतीय संघाचे नेतृत्व शुभमन गिल करणार असून, केएल राहुलकडे उपकर्णधारपदाची धुरा सोपवण्यात आली आहे.

रवींद्र जडेजाचे जोरदार पुनरागमन
श्रीलंकेविरुद्धचा संघ जाहीर होण्यापूर्वी अष्टपैलू खेळाडू रवींद्र जडेजाच्या निवडीबाबत क्रिकेट वर्तुळात मोठी उत्सुकता होती. जडेजाने आपला शेवटचा कसोटी सामना २६ नोव्हेंबर २०२५ रोजी दक्षिण आफ्रिकेविरुद्ध खेळला होता. त्यानंतर त्याला एकदिवसीय संघातूनही (IND vs SL) वगळण्यात आले होते. मात्र, आता ८ महिन्यांच्या (२६२ दिवस) प्रदीर्घ प्रतीक्षेनंतर जडेजा पुन्हा एकदा कसोटी संघात पुनरागमन करण्यासाठी सज्ज झाला आहे.

बुमराह आणि साई सुदर्शनच्या सहभागावर प्रश्नचिन्ह
जसप्रीत बुमराह आणि साई सुदर्शन यांचा संघात समावेश करण्यात आला असला, तरी त्यांचा अंतिम ११ मधील सहभाग हा त्यांच्या तंदुरुस्तीवर अवलंबून असेल. इंग्लंडविरुद्धच्या दुसऱ्या एकदिवसीय सामन्यानंतर बुमराहला गुडघ्याची दुखापत झाली होती, ज्यामुळे त्याला मालिकेतील निर्णायक सामना गमवावा लागला होता.

नॅशनल क्रिकेट अकादमीच्या ‘सेंटर ऑफ एक्सलन्स’कडून तंदुरुस्तीचे प्रमाणपत्र मिळाल्यानंतरच बुमराह आणि सुदर्शन मैदानात उतरू शकतील. तसेच, अष्टपैलू वॉशिंग्टन सुंदर दुखापतीमुळे या निवडीसाठी अनुपलब्ध असल्याचे बीसीसीआयने स्पष्ट केले आहे.

नवीन चेहऱ्यांना संधी
या मालिकेत फिरकी गोलंदाज सारांश जैनला पहिल्यांदाच राष्ट्रीय संघात स्थान मिळाले आहे. त्याच्यासोबतच मानव सुथार आणि गुरनूर ब्रार यांसारख्या युवा खेळाडूंनाही भारतीय संघात स्वतःला सिद्ध करण्याची संधी मिळाली आहे.

कसोटी मालिकेसाठी भारतीय संघ

शुभमन गिल (कर्णधार), केएल राहुल (उपकर्णधार), यशस्वी जयस्वाल, ऋषभ पंत (यष्टीरक्षक), साई सुदर्शन*, ध्रुव जुरेल (यष्टीरक्षक), रवींद्र जडेजा, कुलदीप यादव, मानव सुथार, जसप्रीत बुमराह*, मोहम्मद सिराज, प्रसिद्ध कृष्णा, गुरनूर ब्रार, देवदत्त पडिक्कल आणि सारांश जैन.

भारत विरुद्ध श्रीलंका कसोटी मालिका वेळापत्रक (IND vs SL) 

पहिला कसोटी सामना: १५ ते १९ ऑगस्ट (स्थळ: गॉल)
दुसरा कसोटी सामना: २३ ते २७ ऑगस्ट (स्थळ: कोलंबो)
सामन्याची वेळ: दोन्ही सामने भारतीय वेळेनुसार सकाळी १० वाजता सुरू होतील.