India vs England 4th Test, R Ashwin Vs England : इंग्लंडविरुद्धच्या कसोटी मालिकेत फलंदाजांसाठी धोकादायक ठरलेला भारताचा फिरकीपटू आर अश्विन (R ashwin)ने आतापर्यंत शानदार कामगिरी केली आहे. अश्विनने संपूर्ण मालिकेत गोलंदाजीसह फलंदाजीतही छाप उमटवली आहे. भारत आणि इंग्लंड यांच्यात राजकोट येथे झालेल्या कसोटी सामन्यात आर अश्विनने कसोटी क्रिकेटमधील 500 बळी पूर्ण केले. हा विक्रम करणारा तो दुसरा भारतीय ठरला आहे. आता तो रांची कसोटीतही मोठी कामगिरी करू शकतो. इंग्लंडविरुद्ध 100 कसोटी बळी घेणारा तो पहिला भारतीय ठरू शकतो.

आर अश्विनने आतापर्यंत कसोटी क्रिकेटमध्ये इंग्लंडविरुद्ध 99 बळी घेतले आहेत. जर त्याने रांचीमध्ये फक्त एक विकेट घेतली तर हे यश त्याच्या नावावर होईल. आतापर्यंत एकाही भारतीय गोलंदाजाला इंग्लंडविरुद्ध 100 बळींचा आकडा गाठता आलेला नाही. भारतासाठी, भागवत चंद्रशेखर (95) आणि अनिल कुंबळे (92) यांनी इंग्लंडविरुद्ध कसोटी क्रिकेटमध्ये 90+ विकेट घेतल्या, परंतु हे दोन्ही महान गोलंदाज 100 बळींचा जादुई आकडा गाठू शकले नाहीत.

अश्विन हा अनिल कुंबळे आणि भागवत चंद्रशेखर यांना मागे टाकून सध्याच्या कसोटी मालिकेतच इंग्लंडविरुद्ध सर्वाधिक बळी घेणारा गोलंदाज बनला आहे. अश्विनने आतापर्यंत इंग्लंडविरुद्ध एकूण 22 कसोटी सामने खेळले असून 29.28 च्या गोलंदाजीच्या सरासरीने त्याने 99 बळी घेतले आहेत. या काळात त्याने 6 वेळा 5-5 विकेट घेतल्या आहेत.

अँडरसनने घेतल्या आहेत  145 विकेट…

भारत आणि इंग्लंड यांच्यातील कसोटी सामन्यात सर्वाधिक विकेट्स घेण्याचा विक्रम जेम्स अँडरसनच्या नावावर आहे. इंग्लंडच्या या वेगवान गोलंदाजाने भारताविरुद्ध एकूण 145 कसोटी विकेट घेतल्या आहेत. अश्विनला अँडरसनचा विक्रम मोडणे अशक्य आहे पण भारत-इंग्लंड कसोटी सामन्यात 100 बळी घेणारा दुसरा गोलंदाज होण्याचा विक्रम तो नक्कीच घडवणार आहे.

IND Vs ENG 4th Test : चौथ्या कसोटीसाठी भारताच्या प्लेईंग 11 मध्ये होणार बदल, ‘या’ खेळाडूचे स्थान धोक्यात..

कसोटी क्रिकेटमधील टॉप-10 गोलंदाजांमध्ये समावेश…

कसोटी क्रिकेटच्या इतिहासात सर्वाधिक विकेट्स घेणाऱ्या टॉप-10 गोलंदाजांमध्ये आर अश्विनचाही समावेश आहे. या यादीत तो नवव्या क्रमांकावर आहे. असेच खेळत राहिल्यास तो आपल्या क्रमवारीत आणखी सुधारणा करू शकतो. या यादीत मुथय्या मुरलीधरन (800) पहिल्या क्रमांकावर, शेन वॉर्न (708 विकेट) दुसऱ्या क्रमांकावर आणि जेम्स अँडरसन (696 विकेट) तिसऱ्या क्रमांकावर आहे.