IND A vs NEP A : तिलक वर्मा अन् कुमार कुशाग्रच्या वादळी शतकांच्या जोरावर भारताने उभारला धावांचा डोंगर! अभिषेक-वैभव अपयशी
IND A vs NEP A Tilak Kushagra Century : भारत अ संघाने प्रथम फलंदाजी करताना कुमार कुशाग्रा आणि तिलक वर्मा यांच्या शतकांच्या जोरावर नेपाळसमोर ३३३ धावांचे लक्ष्य ठेवले आहे.

IND A vs NEP A Captain Tilak Varma and Kumar Kushagra smash brilliant centuries : भारत अ संघाचे कर्णधारपद मिळताच तिलक वर्माने आपल्या पहिल्याच सामन्यात नेपाळविरुद्ध शानदार शतक झळकावत सर्वांचे लक्ष वेधून घेतले आहे. कतार येथे सुरू असलेल्या ‘रायझिंग स्टार आशिया चषक २०२६’ च्या गट फेरीतील सामन्यात प्रथम फलंदाजी करताना भारताची सुरुवात अत्यंत खराब झाली होती. अवघ्या ५० धावांच्या आत भारताने आघाडीचे ३ गडी गमावले असताना, तिलक वर्माने अत्यंत कठीण परिस्थितीत जबाबदारी स्वीकारत ऐतिहासिक खेळी केली.
सलामीवीर अपयशी ठरल्यानंतर संकटात सापडला होता संघ –
या सामन्यात चाहत्यांच्या नजरा अभिषेक शर्मा आणि वैभव सूर्यवंशी या स्फोटक सलामी जोडीवर खिळल्या होत्या. मात्र, नेपाळी गोलंदाजांनी सुरुवातीच्या १० षटकांतच भारतीय फलंदाजीला मोठे धक्के दिले. अभिषेक शर्मा, वैभव सूर्यवंशी आणि आयुष बडोनी हे तिन्ही फलंदाज संघाच्या अवघ्या ४२ धावांवर तंबूत परतले. त्यामुळे भारतीय संघ मोठ्या संकटात सापडला होता आणि डाव सावरण्याचे मोठे आव्हान कर्णधारासमोर उभे राहिले होते.
जीवदान मिळाल्यानंतर तिलकने बदलला गिअर –
📸📸 Captain coming up clutch 💯
1️⃣0️⃣7️⃣ runs of pure intent from India A skipper Tilak Varma 👍👍
Updates ▶️ https://t.co/r7KnQLPzIm
#TeamIndia | #INDAvNEP | #RisingStarsAsiaCup https://t.co/8rOwYdEKdD
— BCCI (@BCCI) November 20, 2026
सुरुवातीला खेळपट्टीवर टिकून राहण्यासाठी तिलक वर्माने अत्यंत संयमी खेळ केला आणि एकेका धावेवर भर दिला. वैयक्तिक १ धावेवर असताना नेपाळी क्षेत्ररक्षकांनी तिलकचा झेल सोडला, जे त्यांना खूप महागात पडले. सुरुवातीला ५३ चेंडूत केवळ २४ धावा करणाऱ्या तिलकने ७७ चेंडूत आपले अर्धशतक पूर्ण केले. त्यानंतर त्याने चौकार आणि षटकारांची आतिषबाजी करत १०७ चेंडूत लिस्ट-ए क्रिकेटमधील आपले सातवे शतक पूर्ण केले.
कुमार कुशाग्रचीही स्फोटक शतकी खेळी –
📸 What an innings, what a moment 👏
A knock of immense character from Kumar Kushagra 💯
Updates ▶️ https://t.co/r7KnQLPzIm
#TeamIndia | #INDAvNEP | #RisingStarsAsiaCup https://t.co/QiKeJN4Vio
— BCCI (@BCCI) November 20, 2026
कर्णधार तिलक वर्माला युवा यष्टीरक्षक-फलंदाज कुमार कुशाग्रने उत्तम साथ दिली. तिलक सुरुवातीला संथ खेळत असताना कुशाग्रने दुसऱ्या बाजूने धावांची गती वाढवून ठेवली. कुशाग्रने केवळ ९३ चेंडूत आपले शतक पूर्ण केले आणि १० चौकार व ५ षटकारांच्या मदतीने ११७ धावांची तुफानी खेळी केली. या दोन्ही फलंदाजांनी नेपाळी गोलंदाजांची चांगलीच धुलाई करत सामन्याचे चित्र पूर्णपणे पालटून टाकले.
२०६ धावांच्या भागीदारीने उभारला भक्कम डोंगर
तिलक वर्मा आणि कुमार कुशाग्र या जोडीने चौथ्या विकेटसाठी तब्बल २०६ धावांची विक्रमी भागीदारी रचून भारतीय डावाला भक्कम पाया रचून दिला. तिलक वर्मा १०७ धावा करून बाद झाला, पण तोपर्यंत भारत अ संघाने २८३ धावांपर्यंत मजल मारली होती. या दोन्ही युवा फलंदाजांच्या दमदार शतकांमुळे भारताने नेपाळसमोर विजयासाठी ३३३ धावांचे मोठे लक्ष्य उभे केले आहे.





