पाटणा – बिहारमध्ये नव्याने सत्तेवर आलेल्या महागठबंधन सरकारचा मंत्रिमंडळ विस्तार करण्यात आला असून त्या मंत्रिमंडळात आज 31 नवीन मंत्र्यांचा समावेश करण्यात आला आहे. या विस्तारात राष्ट्रीय जनता दलाचा दबदबा राहिला असून या पक्षाला सर्वाधिक मंत्रिपदे मिळाली आहेत. आज राजदच्या वाट्याला एकूण 16 मंत्रिपदे आली तर संयुक्‍त जनता दलाकडे 11 मंत्रिपदे आली आहेत. कॉंग्रेसला दोन, हम पक्षाला एक तर एका अपक्षालाही मंत्रिमंडळात स्थान मिळाले आहे.

दोन्ही प्रमुख पक्षांमध्ये झालेल्या समझोत्यानुसार संयुक्‍त जनता दलाकडे त्यांची पूर्वीचीच खाती राहतील तर या आधी भाजपकडे असलेली बहुतांश खाती राष्ट्रीय जनता दलाकडे सोपवण्यात येणार आहेत. फक्त अर्थ आणि शिक्षण खात्यात अदलाबदली केली जाणार आहे. अर्थ खाते संयुक्‍त जनता दलाकडे जाणार असून शिक्षण खाते राष्ट्रीय जनता दलाकडे जाणार आहे. नितीशकुमार आणि तेजस्वी यादव यांच्या नेतृत्वाखालील मंत्रिमंडळात आता मुस्लिमांना 5, ओबीसी आणि आर्थिक मागासांना एकूण 17, सर्वणांना 6, आणि अनुसूचित जातीच्या 5 जणांना स्थान मिळाले आहे.

आज झालेल्या शपथविधीमध्ये संयुक्‍त जनता दलातर्फे विजय चौधरी, अशोक चौधरी, विजयेंद्र यादव, श्रवणकुमार, संजय झालेसी सिंह, जमा खान, जयंत राज, सुनिल कुमार, मदन सहानी, शीला मंडल यांना मंत्रि करण्यात आले आहे. तर राष्ट्रीय जनता दलाकडून तेजप्रताप यादव, अलोक मेहता, अनिता देवी, कुमार सर्वजीत, समीर महासेठ, मोहंमद नवाज, रामानंद यादव, सुरेंद्र यादव, शमिम अहमद, सुरेंद्र राम अदिंना मंत्रिपदे देण्यात आली आहेत. कॉंग्रेस कडून मुरारी गौतम, अफाक अहमद यांना मंत्री करण्यात आले आहे.