मुंबई – गेल्या काही दिवसांपासून बॉलिवूडमध्ये अनेक क्रिकेटपटूंवर बायोपिकची निर्मिती केली जात आहे. महेंद्रसिंह धोनी, कपिल देव यानंतर आता या यादीत आणखी एका क्रिकेटपटूचे नाव जोडले जाणार आहे. क्रिकेटपटू प्रवीण तांबे यांचा क्रिकेटमधील संघर्षमय जीवनावर आधारित लवकरच एक चित्रपट प्रदर्शित होणार आहे. “कौन प्रवीण तांबे?’ असे या चित्रपटाचे नाव आहे.

नुकतंच या चित्रपटाचा ट्रेलर प्रदर्शित झाला असून, मराठमोळा अभिनेता ‘श्रेयश तळपदे’ प्रवीण तांबे यांची मुख्य भूमिका साकारताना दिसत आहे. या चित्रपटात श्रेयशची एक अनोखी शैली पाहायला मिळत आहे. “कौन प्रवीण तांबे?’ माध्यमातून श्रेयस जवळपास 17 वर्षांनंतर पुन्हा एकदा क्रिकेटपटूच्या भूमिकेत दिसणार आहे. याआधी तो ‘इक्बाल’ चित्रपटाच्या माध्यमातून प्रेक्षकांच्या भेटीला आला होता.

चित्रपटाच्या ट्रेलरची सुरुवात ही क्रिकेटपटू राहुल द्रविड यांच्या प्रस्तावनेतून होते. आणि पुढे “कौन प्रवीण तांबे?’ याचा संपूर्ण जीवनप्रवास दाखविण्यात आला आहे. राष्ट्रीय आणि आंतरराष्ट्रीय स्तरावर संधी मिळण्यासाठी सतत 20 वर्षे वाट पाहिल्यानंतर प्रथम आयपीएल आणि नंतर मुंबईच्या रणजी संघात स्थान मिळवणारा प्रवीण आपल्या छोट्याशा कारकिर्दीत अनेकांना सातत्याने प्रयत्न करण्याच्या प्रेरणा देऊन गेला. आता याच प्रवीणच्या जीवणावर बायोबिक येतोय. हा चित्रपट हिंदी, तामिळ आणि तेलुगू भाषेत प्रदर्शित होणार आहे.

प्रवीण तांबेची आयपीएल कारकीर्द

प्रवीण तांबेचा जन्म 8 ऑक्टोबर 1971 रोजी मुंबई येथे झाला. त्याचे वडील विजय तांबे जॉन्सन अँड जॉन्सन संघासाठी क्रिकेट खेळायचे. त्यावेळी प्रवीणही वडिलांसोबत खेळायला जात असे, तेथूनच प्रवीणला क्रिकेटची आवड निर्माण झाली. मात्र, संघर्षमय जीवनातून प्रवीण तांबेला 2013 मध्ये पहिल्यांदा आयपीएलमध्ये संधी मिळाली. देशांतर्गत टी-20 स्पर्धेदरम्यान त्याला राहुल द्रविड आणि पॅडी अप्टन यांनी हेरले आणि राजस्थान रॉयल्ससाठी करारबद्ध केले.

प्रवीणला राजस्थान रॉयल्सने जेव्हा ट्रायल्ससाठी बोलवले तेव्हा एकाही फलंदाजाला प्रवीणच्या फिरकीचा सहजपणे सामना करता आला नाही. प्रवीणच्या या कामगिरीने प्रभावीत होत, राहुल द्रविडने नमूद केले की, त्याला त्याच्या वयाची पर्वा नाही. प्रवीणच्या कौशल्याला तुम्ही वयाचा बंधनात अडकवू शकत नाही. 2013 ते 2015 पर्यंत राजस्थानकडून खेळल्यानंतर प्रवीणला 2016मध्ये गुजरात लायन्स तर 2017मध्ये सनराझर्स हैदराबादचे प्रतिनिधीत्व करण्याची संधी मिळाली.