Pune Exit Poll | राज्यातील 29 महापालिका निवडणुकीचे मतदान पार पडल्यानंतर लगेच दुसऱ्या दिवशी आज 16 जानेवारीला निकाल स्पष्ट होणार आहेत. सकाळी 10 वाजल्यापासून निकालाला सुरुवात होणार असून सायंकाळी 5 वाजेपर्यंत निवडणुकांचा संपूर्ण निकाल जाहीर होतील. मुंबई पाठोपाठ महत्त्वाच्या समजल्या जाणाऱ्या पुणे महापालिकेतही कोणाची सत्ता येणार याकडे सर्वांचे लक्ष लागले आहे. पुण्यात भाजप आणि अजित पवारांच्या राष्ट्रवादी कॉँग्रेस पक्षाची काटे की टक्कर पाहायला मिळाली. मात्र एक्झिट पोलनुसार पुण्यामध्ये पुन्हा एकदा भाजपला स्पष्ट बहुमत मिळताना दिसत आहे, पुण्यात भाजपला 93 जागा मिळण्याचा अंदाज आहे. तर राष्ट्रवादी अजित पवार गट आणि राष्ट्रवादी शरद पवार गट यांना मोठा धक्का बसण्याची शक्यता आहे. पॉलिटिकल ब्युरो अँड अॅनालिसिस ब्युरो म्हणजेच प्राब संस्थेनं पुणे महापालिकेचा एक्झिट पोल दिला आहे. प्राबच्या सर्वेक्षण आकडेवारीनुसार, पुणे महापालिकेच्या 162 जागांपैकी 90 पेक्षा जास्त जागा जिंकून भाजपच सर्वात मोठा पक्ष ठरेल, असा अंदाज वर्तवण्यात आला आहे. त्यामुळे, प्राबच्या सर्वेक्षणानुसार पुण्यात अजित पवारांच्या राष्ट्रवादीला मोठा धक्का असून शिंदेंच्या शिवसेनेलाही कमी जागा जिंकता येत असल्याचं स्पष्ट होत आहे. प्राबच्या सर्वेक्षणानुसार, पुण्यात राष्ट्रवादीला 43 जागा मिळण्याचा अंदाज आहे. तर, ठाकरेंच्या शिवसेनेला 7 आणि काँग्रेसला 8 जागा मिळण्याचा अंदाज वर्तवण्यात आला आहे. Pune Exit Poll | पिंपरी चिंचवड महापालिकेतही भाजपचीच सत्ता तर, पिंपरी चिंचवड महापालिकेतही भाजपचीच सत्ता येईल, असा अंदाज आहे. दरम्यान, विधानसभा निवडणुकीतही प्राबने वर्तवलेला अंदाज भाजप महायुतीच्या बाजुने होता, त्याहीपेक्षा मोठं यश महायुतीला मिळालं होतं. मात्र आता देखील अंदाज खरा ठरणार का हे पाहावे लागणार आहे. गेल्यावेळी पुणे महापालिकेत भाजपला स्पष्ट बहुमत मिळालं होतं. तब्बल 97 जागा भाजपला मिळाल्या होत्या तर राष्ट्रवादी दोन नंबरला होतं, पुणे महापालिकेत राष्ट्रवादीला गेल्यावेळी 39 जागा मिळाल्या होत्या, मात्र यावेळी राजकीय समीकरण बदलली होती, राष्ट्रवादीमध्ये फूट पडली असली तरी पुण्यात दोन्ही राष्ट्रवादी एकत्र आल्या, दोन्ही राष्ट्रवादी विरोधात भाजप असा हा थेट सामना आहे. Pune Exit Poll | युतीचे समीकरण दरम्यान, पुणे महापालिकेत सत्ता स्थापन करण्यासाठी 82 जागांची गरज आहे. तर पिंपरी चिंचवडमध्ये 65 जागांची गरज लागणार आहे. पुणे महापालिकेमध्ये अजित पवारांची राष्ट्रवादी आणि शरद पवारांची राष्ट्रवादी यांची आघाडी झाली. तर भाजप आणि शिवसेना शिंदे वेगवेगळे लढले. याशिवाय उद्धव ठाकरेंची शिवसेना, मनसे आणि काँग्रेसची युती पाहायला मिळाली. आपने देखील यावेळी आपल्या पक्षाचे उमेदवार उभे केले आहेत. तर पिंपरी-चिंचवडमध्ये भाजप-रिपाइं (आठवले) यांची युती आहे. राष्ट्रवादी अजित पवार व राष्ट्रवादी शरद पवार यांची आघाडी केली आहे. तर उद्धवसेना-मनसे यांची आघाडी झाली आहे. शिंदेसेना, काँग्रेस आणि वंचित यांची स्वतंत्रपणे लढत आहे. हेही वाचा: PMC Election: बटण कोणतेही दाबा, मत ‘कमळा’लाच? उमेदवारांनी केला गंभीर आरोप
