महाबळेश्वर : महाबळेश्वर नगरीतील विस्कटलेली स्वच्छतेची घडी पुन्हा बसवण्यासाठी नगराध्यक्षांनी सहकारी नगरसेवकांसह थेटग्राउंड लेव्हलवर उतरत कारवाईला सुरुवात केली आहे. या मोहिमेची सुरुवात शहरातील महत्त्वाच्या छत्रपती शिवाजी महाराज चौकापासून करण्यात आली असून, अनेक दिवसांपासून बकाल अवस्थेत असलेला हा एकमेव प्रशस्त चौक आता पुन्हा एकदा उजळणार आहे.

या चौकातील वाहतूक व्यवस्थापन सुधारण्यासोबतच नव्याने उभारलेल्या अनधिकृत टपऱ्या तसेच बंद अवस्थेतील वाहनांवर कारवाई केली जाणार आहे. त्यामुळे पर्यटकांसाठी पार्किंगची सुविधा उपलब्ध होणार असून, वाहतूक कोंडीला मोठा दिलासा मिळणार आहे.

जागतिक दर्जाचे पर्यटन स्थळ असूनही महाबळेश्वर शहरातील अनेक भागांत अस्वच्छता, अस्ताव्यस्त पार्किंग आणि अनधिकृत टपऱ्यांमुळे नागरिकांना व पर्यटकांना मोठ्या अडचणींचा सामना करावा लागत होता. तापोळ्याला जाणाऱ्या मार्गावरील हा चौक अत्यंत महत्त्वाचा असल्याने येथे वाहनांची सतत वर्दळ असते. मात्र, अस्ताव्यस्त पार्किंगमुळे नेहमीच प्रचंड वाहतूक कोंडी होत होती.

एकेकाळी चौकाची शोभा वाढवणारे कारंजे तत्कालीन सुशोभीकरणाच्या कामात घाईघाईने तोडण्यात आले. तसेच चौकाला लागून असलेल्या ग्रामीण रुग्णालयाच्या भिंतीलगत मोठ्या प्रमाणात घाणीचे साम्राज्य निर्माण झाले होते. यामुळे शहराची शोभा वाढवणारा हा चौक बकाल अवस्थेत गेला होता. येथील सार्वजनिक स्वच्छतागृहाची अवस्थाही खराब झाली होती. याबाबत संबंधित ठेकेदाराला नियमित स्वच्छता व निगा राखण्याच्या स्पष्ट सूचना देण्यात आल्या आहेत.

या चौकाची विस्कटलेली घडी पुन्हा बसवण्यासाठी नगराध्यक्ष सुनील शिंदे यांच्या नेतृत्वाखाली नगरपरिषद कर्मचाऱ्यांना आवश्यक त्या सूचना देण्यात आल्या आहेत.

यावेळी नगराध्यक्ष सुनील शिंदे यांच्यासह नगरसेवक अफजलभाई सुतार, ॲड. संजय जंगम, संतोष आबा शिंदे, राहुल पिसाळ, रोहित ढेबे, नगरसेविका विमलताई पारठे, संगीता वाडकर, रेश्मा ढेबे, पल्लवी कोंढाळकर, प्रियांका वायदंडे तसेच नगरपरिषदेचे मुख्य लिपिक आबाजी ढोबळे व इतर कर्मचारी उपस्थित होते.