Imtiaz Ali: रोमँटिक चित्रपटांसाठी ओळखले जाणारे दिग्दर्शक इम्तियाज अली यांनी १४ फेब्रुवारी रोजी आपल्या नव्या ‘हीर रांझा’ या चित्रपटाची घोषणा करून चाहत्यांना मोठे सरप्राइज दिले होते. अनाउन्समेंट व्हिडिओमध्ये त्यांच्या आधीच्या लैला मजनू या चित्रपटातील काही झलक दाखवण्यात आल्या होत्या. त्यामुळे हा चित्रपटही एक हृदयस्पर्शी आणि क्लासिक प्रेमकथा असणार, हे स्पष्ट झाले आहे. आता या चित्रपटाच्या कास्टिंगबाबत जोरदार चर्चा सुरू झाली आहे. ‘हीर रांझा’ ही प्रसिद्ध पंजाबी लोककथेवर आधारित प्रेमकथा आहे. ही कथा अनेक वर्षांपासून लोकांच्या मनात घर करून आहे. या नव्या आवृत्तीत ती भव्य आणि भावनिक स्वरूपात मांडली जाणार असल्याचे सांगितले जात आहे. काही माध्यमांच्या अहवालानुसार, हा चित्रपट ‘लैला मजनू’च्या कथाविश्वाचा पुढचा भाग मानला जात आहे. या चित्रपटाची निर्मिती एकता कपूर करणार आहेत. त्यांनी याआधीही इम्तियाज अली यांच्यासोबत काम केले आहे. चित्रपटाच्या मुख्य अभिनेत्रीच्या भूमिकेसाठी सध्या सारा अर्जुन हिचे नाव आघाडीवर असल्याची चर्चा आहे. ‘धुरंधर’ या चित्रपटातून तिने विशेष ओळख मिळवली. निर्माते ‘हीर’च्या भूमिकेसाठी नव्या आणि निरागस चेहऱ्याच्या शोधात आहेत, आणि सारा या भूमिकेसाठी योग्य ठरू शकते, असे म्हटले जात आहे. तिच्या अभिनयातील सहजता आणि भावनिक अभिव्यक्ती या भूमिकेला साजेशी ठरू शकते. Sara Arjun तर ‘रांझा’च्या भूमिकेसाठी रोहित सराफ याचे नाव चर्चेत आहे. अधिकृत घोषणा अद्याप झालेली नसली तरी सारा आणि रोहित ही जोडी पडद्यावर ताजी आणि आकर्षक वाटू शकते, असे मत व्यक्त केले जात आहे. दोघांचीही रोमँटिक प्रतिमा या क्लासिक प्रेमकथेला साजेशी ठरू शकते. वर्कफ्रंटबाबत बोलायचे झाले तर सारा अर्जुन लवकरच ‘धुरंधर २’मध्ये दिसणार आहे. या चित्रपटात तिच्यासोबत रणवीर सिंह मुख्य भूमिकेत असणार आहेत. हा चित्रपट १९ मार्च रोजी प्रदर्शित होणार असल्याचे सांगितले जात आहे. सध्या ‘हीर रांझा’च्या अधिकृत कास्टिंग घोषणेची सर्वांना उत्सुकता आहे. इम्तियाज अली यांच्या दिग्दर्शनात आणि एकता कपूर यांच्या निर्मितीत साकार होणारी ही प्रेमकथा प्रेक्षकांच्या मनात पुन्हा एकदा प्रेमाची जादू निर्माण करेल, अशी अपेक्षा आहे.
