फास्टॅगचा परिणाम : टोलनाक्यावर वाहनांच्या रांगा
नेटवर्कच्या अभावाने सुविधेचा अक्षरशः बोजवारा
अनेक वाहनांना अजून फास्टॅग लावणे बाकी
सुविधांच्या अभावामुळे फास्टॅग झाला स्लोटॅग
पुणे/ खेड शिवापूर – राष्ट्रीय महामार्ग प्राधिकरणाने महामार्गावरील टोल नाक्यांवर फास्टॅगची सुविधा दि. 14च्या मध्यरात्रीपासून सुरू केली; मात्र खेड शिवापूर टोलनाक्यावर सकाळपासूनच नेटवर्क कमी असल्याने फास्टॅगच्या लेनमध्ये वाहनांच्या लांबच लांब रांगा लागल्या.
शनिवारी (दि. 14) मध्यरात्रीपासून राष्ट्रीय महामार्ग प्राधिकरणाने सुरू केलेल्या फास्टॅगची सुविधाही खडतर असल्याचे पहिल्याच दिवशी दिसून आले. दि.1 डिसेंबर रोजी सुरू होणारी फास्टॅग सुविधा 15 डिसेंबरपर्यंत स्थगित केली होती. ती आजपासून पुन्हा सुरू करण्यात आली; मात्र परिस्थिती खूपच वेगळी होती. फास्टॅगमधून जाणाऱ्या प्रत्येक वाहनांवर फास्टॅगची चिप असूनसुद्धा केवळ नेटवर्कच्या अडचणीमुळे वाहन चालकांना टोल रोख भरावा लागत होता. एका गाडीला पाच पाच मिनिटे लागत होते. त्यामुळे वाहनांच्या सुमारे दोन किलोमीटर रांगा लागल्या. त्यामुळे फास्टॅग असूनही अनेक वाहनांकडून टोल रोख घेतला जात होता.तसेच जी वाहने टोलमुक्त आहेत त्यांचे काय करायचे, या बाबतीत टोल कर्मचारी व टोल प्रशासनाने काहीही ठोस भूमिका घेतली नसल्याने वाहनचालक व कर्मचारी यांच्यात वाद विवाद होत होते. त्यामुळे वाहनांच्या रांगा वाढत होत्या.
सातारा बाजूकडून पुणे बाजूकडे जाण्यासाठी 10 लेनपैकी 5 लेनवर रोख व 5 लेनवर फास्टॅग अशी टोल वसुली सुरू केली; पण त्याचा फारसा फरक पडताना दिसत नव्हता.
पाच लेन फास्टॅगसाठी
टोल प्रशासनाने सांगितले की, “आम्ही पाच लेन ह्या फास्टॅगसाठी केल्या आहेत. तर इतर वाहनांसाठी पाच लेन आहेत. मात्र बऱ्याच वाहन चालकांच्या खात्यात बाकी नसल्याने अडचण येत आहे. रविवार असल्याने वाहने मोठ्या संख्येने आहेत. त्याचप्रमाणे या ठिकाणी नेटवर्कचा प्रॉब्लेम असल्याने फास्टॅगला अडचणी येत आहेत.’
वाहनांना “फास्टॅग’ बसवण्यात आले आहे. मात्र, ते स्कॅन होत नसल्याने टोलनाक्यावर पैशांची मागणी केली जात आहे. तसेच, नेटवर्कचा प्रॉब्लेम आल्याने टोलनाक्यावर वाहनांच्या रांगा लागल्या होत्या. या परिस्थितीमुळे मनस्ताप सहन करावा लागला.
– वैभव भोईटे, वाहनचालक
टोलनाक्यावर फास्टॅगद्वारे वसुली करणारी यंत्रणा सुरळीत नसल्याने वाहनचालकांना नाहक मनस्ताप सहन करावा लागत आहे. नियोजनशून्य कारभारामुळे वाहनचालकांना टोलनाक्यावरुन मोफत सोडण्याची गरज आहे.
– विवेक वेलणकर, सजग नागरिक मंच
टोलनाक्यावर फास्टॅगसाठी जादा लेन ठेवण्यात आलेल्या आहेत. याचबरोबर, वाहनांची संख्या वाढल्यास लेनची संख्या वाढवण्यात येणार असून फास्टॅग नसणाऱ्या वाहनांसाठी वेगळ्या लेन ठेवलेल्या आहेत. तसेच, काही वाहनांवर फास्टॅग असूनही खात्यात रक्कम नसल्याने अडचणी येत आहेत.
– सुहास चिटणीस, प्रकल्प अधिकारी, राष्ट्रीय महामार्ग प्राधिकरण
