Illegal Banners – सांगवी व नवी सांगवी परिसरात अनधिकृत बॅनर लावण्याचे प्रमाण वाढत असून यामुळे परिसराचे विद्रुपीकरण होण्याबरोबरच नागरिकांच्या सुरक्षेलाही धोका निर्माण होत असल्याची तक्रार पुढे आली आहे. सुनेत्रा महिला प्रतिष्ठानच्या अध्यक्षा मंदाकिनी दिलीप तनपुरे यांनी यासंदर्भात पिंपरी-चिंचवड महापालिका आयुक्त व महापौरांना निवेदन दिले आहे. निवेदनात म्हटले आहे की, महापालिकेने अलिकडेच धूळमुक्त शहर, महिला कर्मचारी धोरण, मोकाट कुत्र्यांपासून संरक्षण आणि पायाभूत सुविधांवर भर असे महत्त्वपूर्ण निर्णय घेतले असून त्याचे नागरिकांकडून स्वागत होत आहे. मात्र, शहरात वाढणाऱ्या अनधिकृत बॅनरमुळे या प्रयत्नांना तडा जात असल्याचे त्यांनी म्हटले आहे. हवामान विभागाने वाऱ्यासह पावसाचा अंदाज वर्तविल्यामुळे मोठ्या आकाराचे बॅनर कोसळून अपघात होण्याची शक्यता अधिक वाढली आहे. यापूर्वीही पुणे व पिंपरी-चिंचवड परिसरात बॅनर कोसळून जीवितहानी झाल्याच्या घटना घडल्या आहेत. सांगवी प्रभाग क्रमांक ३२ मध्ये २५ व २६ मार्च रोजी ग्रामदैवत वेताळ महाराज जत्रा आणि रामनवमी उत्सव मोठ्या उत्साहात साजरा होणार आहे. या निमित्ताने हजारो भाविक, नागरिक, तसेच विविध पारंपरिक मिरवणुका, कुस्ती स्पर्धा, वाद्य पथके यांचा मोठा सहभाग असतो. अशा गर्दीच्या पार्श्वभूमीवर अनधिकृत बॅनरमुळे गंभीर दुर्घटना घडू शकते, अशी भीती व्यक्त करण्यात आली आहे. सध्या काही व्यक्ती कोणतीही परवानगी न घेता बांबूच्या सांगाड्यांवर मोठे बॅनर उभारून ते वीज खांब, झाडे आणि सीसीटीव्ही खांबांना बांधत आहे. महापालिकेने तात्काळ दखल घेऊन अशा बॅनरवर कारवाई करावी, तसेच फक्त बॅनर काढण्यापुरती मर्यादित न राहता संबंधितांवर दंडात्मक कारवाई करावी. अधिकृत परवानगी घेऊनच बॅनर लावण्याची सक्ती केल्यास महापालिकेच्या उत्पन्नात वाढ होईल आणि शहराचे सौंदर्यही जपले जाईल, असेही तनपुरे यांनी निवेदनात म्हटले आहे.
