IIFA Awards 2026 : बॉलिवूडमध्ये सध्या एका चित्रपटाचीच हवा आहे आणि तो म्हणजे रणवीर सिंगचा ‘धुरंधर’! बॉक्स ऑफिसवर दमदार कामगिरी केल्यानंतर आता या चित्रपटाने प्रतिष्ठेच्या आयफा पुरस्कार सोहळ्यातही अक्षरशः धुमाकूळ घातला आहे.

२०२६ च्या २६ व्या इंटरनॅशनल इंडियन फिल्म अॅकॅडमी (IIFA) पुरस्कारांची विजेत्यांची यादी जाहीर झाली असून, ‘धुरंधर’ने तब्बल १२ पुरस्कार पटकावत यंदाच्या सोहळ्यावर आपली मोहोर उमटवली आहे.

विशेष म्हणजे, सर्वोत्कृष्ट अभिनेता म्हणून रणवीर सिंगच्या नावाची घोषणा झाली, तर ‘सैयारा’मधील अभिनयासाठी अभिनेत्री अनित पड्डाने सर्वोत्कृष्ट अभिनेत्रीचा मान मिळवला. त्यामुळे यंदाच्या आयफामध्ये एका बाजूला रणवीरच्या अभिनयाचा जलवा पाहायला मिळाला, तर दुसरीकडे अनित पड्डाच्या यशानेही सर्वांचे लक्ष वेधून घेतले.

दिग्दर्शक आदित्य धर यांच्यासाठीही हा सोहळा खास ठरला. सर्वोत्कृष्ट चित्रपट आणि सर्वोत्कृष्ट दिग्दर्शकासह अभिनय, संगीत, लेखन आणि तांत्रिक अशा विविध विभागांमध्ये ‘धुरंधर’ने पुरस्कारांची लयलूट केली. अक्षय खन्नाच्या खलनायकी भूमिकेचेही विशेष कौतुक झाले.

हुमा कुरैशी आणि संजय दत्त यांनी सहाय्यक भूमिकांमधील अभिनयासाठी पुरस्कार पटकावले. याशिवाय ‘सैयारा’, ‘छावा’, ‘होमबाउंड’ यांसारख्या चित्रपटांनीही महत्त्वाच्या श्रेणींमध्ये आपली छाप पाडली.

केवळ मोठ्या पडद्यावरील कलाकारच नव्हे, तर ओटीटी विश्वातील कलाकार आणि दिग्दर्शकांचाही डिजिटल पुरस्कार सोहळ्यात गौरव करण्यात आला.

‘धुरंधर’ने पटकावले तब्बल १२ पुरस्कार

यंदाच्या आयफा पुरस्कारांमध्ये ‘धुरंधर’ने सर्वाधिक पुरस्कार मिळवत आपले वर्चस्व सिद्ध केले. या चित्रपटासाठी रणवीर सिंगला सर्वोत्कृष्ट अभिनेता, तर आदित्य धर यांना सर्वोत्कृष्ट दिग्दर्शकाचा पुरस्कार मिळाला.

विशेष म्हणजे, चित्रपटातील अक्षय खन्नाच्या खलनायकी भूमिकेचेही परीक्षकांनी कौतुक केले. त्याला सर्वोत्कृष्ट नकारात्मक भूमिकेचा पुरस्कार मिळाला. तर संजय दत्तने सहाय्यक भूमिकेसाठी पुरस्कार पटकावला.

आयफा पुरस्कार २०२६ मधील प्रमुख विजेत्यांची यादी

– सर्वोत्कृष्ट चित्रपट – ‘धुरंधर’
– सर्वोत्कृष्ट अभिनेत्री (मुख्य भूमिका) – अनित पड्डा (‘सैयारा’)
– सर्वोत्कृष्ट अभिनेता (मुख्य भूमिका) – रणवीर सिंग (‘धुरंधर’)
– सर्वोत्कृष्ट सहाय्यक अभिनेत्री – हुमा कुरैशी (‘जॉली एलएलबी ३’)
– सर्वोत्कृष्ट सहाय्यक अभिनेता – संजय दत्त (‘धुरंधर’)
– सर्वोत्कृष्ट खलनायक – अक्षय खन्ना (‘धुरंधर’)
– सर्वोत्कृष्ट पार्श्वगायक (पुरुष) – फहीम अब्दुल्ला (‘सैयारा’)
– सर्वोत्कृष्ट संगीत दिग्दर्शन – शाश्वत सचदेव (‘धुरंधर’)
– सर्वोत्कृष्ट मूळ कथा – आदित्य धर (‘धुरंधर’)
– सर्वोत्कृष्ट गीत – इरशाद कामिल (‘सैयारा’)
– सर्वोत्कृष्ट रूपांतरित कथा – बशारत पीर, सुमित रॉय आणि नीरज घायवान (‘होमबाउंड’)
– सर्वोत्कृष्ट आंतरराष्ट्रीय चित्रपट – ‘अवतार : फायर अँड अ‍ॅश’
– सर्वोत्कृष्ट महिला पदार्पण – राशा थडानी (‘आझाद’)
– सर्वोत्कृष्ट पुरुष पदार्पण – अहान पांडे (‘सैयारा’)
– सर्वोत्कृष्ट पटकथा – आदित्य धर (‘धुरंधर’)
– सर्वोत्कृष्ट संवाद – आदित्य धर (‘धुरंधर’)
– सर्वोत्कृष्ट पार्श्वसंगीत – ए. आर. रहमान (‘छावा’)
– सर्वोत्कृष्ट स्पेशल इफेक्ट्स/व्हिज्युअल इफेक्ट्स – असेंबलेंज एंटरटेनमेंट आणि रिडिफाइन (‘छावा’)
– सर्वोत्कृष्ट नृत्यदिग्दर्शन – बॉस्को लेस्ली मार्टिस (‘आवन जावन’, ‘वॉर २’)
– सर्वोत्कृष्ट ध्वनी मिश्रण – आलोक डे (‘छावा’)