Rohit Pawar:  पुण्यातील एमपीएससी विद्यार्थ्यांचे आंदोलन 11 दिवसांनंतर अखेर स्थगित करण्यात आले. रोहित पवार एमपीएससीच्या विद्यार्थ्यांसोबत एस.एम.जोशी पुलाजवळ ठाण मांडून होते. एमपीएससी आयोगाचे अध्यक्ष विवेक भीमनवार यांचा राजीनामा घ्यावा, ही आंदोलनकर्त्यांची प्रमुख मागणी होती. मुख्यमंत्री देवेंद्र फडणवीस यांच्याशी झालेल्या दूरध्वनी चर्चेनंतर एमपीएससीचे अध्यक्ष विवेक भीमनवार यांना चौकशी पूर्ण होईपर्यंत सक्तीच्या रजेवर पाठवण्याचा निर्णय सरकारने घेतला.

मात्र, भीमनवारांच्या राजीनाम्याशिवाय रोहित पवार यांनी आंदोलन मागे घेतल्याने ठाकरे गटाच्या उपनेत्या सुषमा अंधारे यांनी नाराजी व्यक्त केली होती. ‘आपण युद्धात जिंकलो आणि तहात हरलो, असे वाटत आहे. अध्यक्षांचा राजीनामा ही मागणी होती. या आंदोलनातून हातात काही पडलं नाही,’ अशी टीका सुषमा अंधारे यांनी केली होती. यावर पत्रकार परिषदेत रोहित पवार यांनी प्रत्युत्तर दिले आहे.

रोहित पवारांचं अंधारेंना प्रत्युत्तर 
रोहित पवार यांनी सुषमा अंधारे यांच्या वक्तव्याचा समाचार घेतला आहे. “मला सुषमा ताईंना आणि लोकांनाही काही गोष्टी सांगायच्या आहेत. तुम्ही एमपीएससी आंदोलनात आलात, व्यासपीठावर आक्रमक बोललात आणि निघून गेलात.

जर खऱ्या अर्थाने तुम्हाला विद्यार्थ्यांचा कळवळा होता तर तिकडे बसायला पाहिजे होतं, राहायला पाहिजे होते. तुमचे नेते तिकडे येऊन राहायला पाहिजे होते आणि या मागणीला पुढे घेऊन जायला पाहिजे होते. टीव्हीवर बोलताना तुम्ही काही बोलू शकता. तिथे काय परिस्थिती असते केवढं प्रेशर होतं. 15 जणांवर कारवाई झाली होती, पोलिसांनी आम्हाला सांगितलं होतं 800 लोकांची नाव आमच्याकडे आहेत,” असे  रोहित पवार म्हणाले.

पुढे ते म्हणाले, “दुसऱ्या दिवशी कारवाई होणार होती, त्यानंतर आणखी 1200 विद्यार्थ्यांवर कारवाई झाली असती कदाचित ही कारवाई झाली असती तर आम्ही तिथे पोलिसांच्या गाडीत असतो, फोटो काढले असते, राजकीय फायदा झाला असता आम्हीही राजकीय पोळी भाजू शकलो असतो. पण त्या विद्यार्थ्यांचं नुकसान झालं असतं त्याचं काय?

त्यांच्या भवितव्याचं नुकसान करुन आम्ही आमच्या राजकीय पोळी भाजल्या असत्या, हिरो बनलो असतो मार खाऊन, हे आम्हाला पटत नाही. त्यामुळे कआपल्याला विद्यार्थ्यांची भूमिका मांडत असताना काही गोष्टींचा विचार करावा लागतो. यापूर्वीही आंदोलन झाली आहेत. मात्र, मुख्य सचिवाची सही असलेली मागण्या मान्य झाल्याचं पत्र मिळवणे सोपे नसते,” असे रोहित पवार यांनी म्हटले.

सुषमा अंधारे काय म्हणाल्या होत्या?
पुण्यातील विद्यार्थ्यांचं एमपीएससी विद्यार्थ्यांचे आंदोलन स्थगित झाल्यानंतर युद्धात जिंकलो आणि तहात हरलो अस वाटतेय, प्रमुख मागणी अध्यक्ष राजीनामा हवा होता. भीमनवार यांना रजेवर पाठवले असते तर मुख्यमंत्री यांनी ट्विट केले असते मात्र त्यांनी स्वतः ट्विट केले त्यातून ते सांगत आहे. मला कोणी काढू शकत नाही मी स्वतः रजेवर जात आहे. विद्यार्थ्यांच्या हातात काहीच पडलेले नाही. जर गुन्हे मागे घेणार असतील, तर विश्रामबाग पोलीस अधिकाऱ्यांनी माफी मागायला हवी,” असं सुषमा अंधारे यांनी म्हटलं.

“विक्रम पाचपुतेने अर्बन नक्षली म्हणले ते साधे शब्द देखील मागे घेतले गेले नाही, मग कस आंदोलन यशस्वी झाले? आंदोलनात सहभागी झालेल्या विद्यार्थ्यांना सरकार पूर्वग्रहदोष होणार नाही? पदवीधरच्या निवडणूकीला फटका बसू नये म्हणून तात्पुरती नाराजी दूर केली गेली. सरकारने विद्यार्थ्यांची चेष्टा केली. रोहित पवारांनी वेळ दिला, योगदान दिलं, मात्र हातात काहीही पडलेलं नाही. विद्यार्थ्यांच्या पदरात काही पडलेले नाही, मराठा आंदोलनात जसं झाले तसचं पुन्हा झालं,” असं सुषमा अंधारेंनी म्हटले.

हेही वाचा: 

Pune Water Cut: पुणेकरांसाठी महत्त्वाची बातमी! दर गुरुवारी पाणीपुरवठा राहणार बंद