Iran US War News – युद्धामुळे बंद असलेली होर्मूझ सामुद्रधुनी पुन्हा सुरू करण्यासाठी इराणने नवीन प्रस्ताव दिला आहे. अमेरिकेने जर इराणी बंदरांची नाकाबंदी उठवली आणि युद्ध समाप्त केले, तर इराण होर्मूझ सामुद्रधुनी खुली करायला तयार आहे, असे या प्रस्तावात सुचवण्यात आले आहे. इराणच्या आण्विक कार्यक्रमाबाबतची व्यापक चर्चा नंतरच्या टप्प्यात केली जाऊ शकते, असे इराणने सुचवले असल्याचे दोन प्रादेशिक अधिकाऱ्यांनी आज सांगितले. इराणचे परराष्ट्र मंत्री अब्बास अराघची यांच्याकडून मिळालेला हा प्रस्ताव पाकिस्तानच्या माध्यमातून अमेरिकेपर्यंत पोचवण्यात आला आहे. प्राथमिक पातळीवर हा एक सकारात्मक प्रस्ताव असू शकतो. मात्र इराणचा आण्विक कार्यक्रम हेच युद्ध सुरू करण्याचे मुख्य कारण असल्याने अमेरिकेचे अध्यक्ष डोनाल्ड ट्रम्प यांच्याकडून हा प्रस्ताव मान्य केला जाणे अवघड आहे. त्यांनी इराणच्या प्रस्तावाचा अधिक तपशील दिला नाही, पण इराणकडे अणुशस्त्र असणार नाही, ही आपली प्रमुख अट आहे, यावर त्यांनी जोर दिला. युद्धविरामाला मुदतवाढ पण तोडगा अजूनही नाही : अमेरिका आणि इराण दरम्यान ७ एप्रिलला झालेल्या युद्धविरामामुळे संघर्ष सध्या तरी थांबला आहे. पण अजूनही कायमचा तोडगा शोधला जाऊ शकलेला नाही. ही कोंडी सोडवण्यासाठी इराणचे परराष्ट्र मंत्री अब्बास अराघची आज सकाळी रशियाचे अध्यक्ष व्लादिमिर पुतीन यांच्याशी चर्चा करण्यासाठी सेंट पीटर्सबर्ग येथे दाखल झाले. अराघची चर्चा करण्यासाठी ओमानला देखील गेले होते. त्यांनी कतार आणि सौदी अरेबियाच्या परराष्ट्र मंत्र्यांशीही फोनवरून चर्चा केली आहे. काल दुसऱ्यांदा पाकिस्तानमध्ये गेलेल्या अराघची यांनी पाक पंतप्रधान शहबाज शरीफ यांचीही भेट घेतली होती. शनिवारी इराणी शिष्टमंडळ पाकिस्तानातून निघून गेल्यावर ट्रम्प यांनी आपले शिष्टमंडळ पाठवण्याचा कार्यक्रमच रद्द करून टाकला होता. आता प्रत्यक्ष चर्चा करण्यासाठी आपले शिष्टमंडळ इस्लामाबादला येणार नाही. जर इराणला चर्चा करायचीच असेल, तर फोनवरून संवाद करता येईल, असे ट्रम्प यांनी म्हटले आहे. लागू असलेला युद्धविराम तकलादू : अमेरिका-इराणमध्ये सध्या जरी युद्धविराम लागू असला, तरी त्याचे स्वरुप अत्यंत तकलादू असेच आहे. होर्मूझमधील सागरी वाहतुकीच्या मुद्द्याभोवती दोन्ही देशांनी आपली रणनिती आखली आहे. इराणला आपले ते विक्री करता येऊ नये, म्हणून अमेरिकेने इराणच्या बंदरांची नाकाबंदी केली आहे. त्यामुळे इराणच्या महसूलाचे नुकसान होते आहे. उत्पादन केलेल्या तेलाची साठवणूक करणे शक्य नसल्याने इराणने आपले तेल उत्पादन देखील थांबवले आहे. युद्ध थांबवण्यासाठी ट्रम्प आणि आखाती देशांवर दबाव आणण्याच्या हेतून इराणने होर्मूझ सामुद्रधुनी बंद करून टाकली आहे. होर्मूझ बंद असल्याने तेलाबरोबर खते, अन्न आणि अन्य उत्पादनांच्या किंमती वाढू लागल्या आहेत. इराणने होर्मूझची सामुद्रधुनी बंद करून टाकल्यामुळे युद्ध सुरू झाल्यापासून तेलाच्या किंमती सतत वाढत आहेत. सोमवारी कच्च्या तेलाची आंतरराष्ट्रीय बाजारातील किंमत प्रति बॅरल १०८ डॉलर इतकी झाली होती. युद्ध सुरू झाल्यापासून तेलाच्या किंमतींमध्ये ५० टक्क्यांनी वाढ झाली आहे.
