Chandra Barot passes away : बॅालिवूडमधून एक दुःखद बातमी समोर आली आहे. महानायक अमिताभ बच्चन यांची मुख्य भूमिका असलेल्या आयकॅानिक डॅान चित्रपटाचे दिग्दर्शकाचे निधन झाले आहे.

प्रसिद्ध दिग्दर्शक चंद्रा बारोट यांची वयाच्या ८६ व्या वर्षी मुंबईत प्राणज्योत मालवली आहे. चंद्रा बारोट हे गेल्या काही काळापासून आजारी होते. त्यांचं निधन मंगळवारी १६ जुलै २०२५ रोजी रात्री उशिरा मुंबईतील त्यांच्या राहत्या घरी झाली असल्याची माहिती आहे. त्यांच्या निधनाच्या वृत्ताने बॅालिवूडवर शोककळा पसरली आहे.

खरंतर चंद्रा बारोट हे क्लासिक चित्रपटांसाठी ओळखले जायचे. त्यांनी आजवर आपल्या कारकिर्दीत अनेक हिंदी चित्रपटांचे दिग्दर्शन केले आहे. १९७८ मध्ये प्रदर्शित झालेल्या आयकॉनिक ‘डॉन’ या चित्रपटाचे दिग्दर्शन त्यांनी केले होते. या चित्रपटाने त्या काळात मोठा इतिहास रचला होता.

आजही हा चित्रपट टेलिव्हिजनवर लागल्यावर अनेकजण तितक्याच आवडीने पाहतात. अशी अजरामर कलाकृती दिग्दर्शक चंद्रा बारोट यांनी तयार करून ठेवली आहे. हा चित्रपट केवळ यशस्वीच ठरला नाही, तर चित्रपटातील संवादापासून गाणी, कथा, अशा सगळ्याच पातळींवर चित्रपटाने नाव केले. नंतरच्या काळात या चित्रपटावर आधारित रिमेक्सही तयार करण्यात आले. मात्र, मूळ डॅान हा चित्रपट आजही खास मानला जातो.