भारतीय क्रिक्रेट प्रेमीसांठी आनंदाची बातमी समोर आली आली आहे. रोहित शर्माच्या नेतृत्वाखाली टीम इंडियाने इतिहास रचत टी-20 आंतरराष्ट्रीय क्रमवारीतही भारतीय संघ 6 वर्षात प्रथमच अव्वल स्थानी पोहचला आहे. वेस्ट इंडिजविरुद्धच्या मालिकेत 3-0 असा क्लीन स्वीप केल्यानंतर भारत सोमवारी आयसीसी पुरुषांच्या T20 संघ क्रमवारीत अव्वल स्थानी पोहोचला. याआधी भारताने टी-20 मालिकेत न्यूझीलंडचा 3-0 असा, एकदिवसीय मालिकेत वेस्ट इंडिजचा 3-0 असा आणि आता टी-20 मालिकेत 3-0 असा पराभव केला.

या दमदार कामगिरीच्या जोरावर भारताला टी-20 संघ क्रमवारीत इंग्लंडला अव्वल स्थानावरून दूर करण्यात यश आले. रोहित शर्माच्या नेतृत्वाखालील भारतीय संघाचे रेटिंगही इंग्लंडच्या बरोबरीने 269 आहे. भारत आणि इंग्लंड या दोघांचे 39 सामन्यांमध्ये 269 रेटिंग आहेत परंतु भारताचे 10,484 गुण आहेत जे इंग्लंड (10474) पेक्षा 10ने अधिक आहेत.

आंतरराष्ट्रीय क्रिकेट परिषद (ICC) च्या नुसार, पाकिस्तान (रेटिंग 266), न्यूझीलंड (255) आणि दक्षिण आफ्रिका (253) पहिल्या पाचमध्ये आहेत, तर ऑस्ट्रेलिया (249) श्रीलंका विरुद्ध 4-1 मालिका जिंकल्यानंतर सहाव्या स्थानावर आहे.

रोहित शर्माच्‍या नेतृत्‍वाखाली भारताचा हा 25 वा टी-20 आंतरराष्ट्रीय सामना होता. या सामन्यात भारताला 21वा विजय मिळाला. त्याच्या यशाचे प्रमाण सुमारे 84 टक्के आहे. त्याचवेळी, त्याच्या नेतृत्वाखाली भारताने सलग 9 वा टी-20 विजय मिळवला आहे. या बाबतीत तो पाकिस्तानचा माजी कर्णधार सर्फराज अहमदच्या बरोबरीने पोहोचला आहे. अफगाणिस्तानचा अश्गर अफगाण 12 विजयांसह आघाडीवर आहे. टी-20 मालिकेत, वेस्ट इंडिजसमोर भारताचा हा सलग चौथा विजय आहे. उभय संघांमधील ही 7वी T20 मालिका होती, ज्यापैकी भारताने पाच वेळा आणि कॅरेबियन संघाने दोन मालिका जिंकल्या आहेत. 2017 मध्ये यूएसएमध्ये झालेल्या टी-20 मालिकेत भारताला वेस्ट इंडिजकडून पराभूत करण्यात आले होते. सहा वर्षांच्या प्रदीर्घ प्रतिक्षेनंतर भारत ICC T20 क्रमवारीत पहिल्या स्थानावर पोहोचला आहे.