ICC ODI Rankings : आयसीसीच्या वनडे क्रमवारीत मोठी उलथापालथ! अर्शदीप सिंगने १२ स्थानांची झेप घेत टॉप-२० मध्ये मारली एन्ट्री
ICC ODI Rankings : भारतीय वेगवान गोलंदाज अर्शदीप सिंगने उत्कृष्ट कामगिरी करत ताज्या आयसीसी एकदिवसीय क्रमवारीत १२ स्थानांची झेप घेतली आहे. तो आता अक्षर पटेलसोबत संयुक्तपणे १९ व्या स्थानावर आहे.

ICC ODI Rankings Arshdeep Singh Jofra Archer Tom Banton Huge Jump : न्यूझीलंडविरुद्धची एकदिवसीय मालिका संपताच आंतरराष्ट्रीय क्रिकेट परिषदेने (ICC) ताजी एकदिवसीय क्रमवारी जाहीर केली असून, भारताचा वेगवान गोलंदाज अर्शदीप सिंगने यामध्ये मोठी मुसंडी मारली आहे. मालिकेतील सातत्यपूर्ण आणि प्रभावी कामगिरीच्या जोरावर अर्शदीपने तब्बल १२ स्थानांची झेप घेत गोलंदाजांच्या यादीत संयुक्तपणे १९ वे स्थान पटकावले आहे. या यादीत अफगाणिस्तानचा फिरकीपटू राशिद खान अद्यापही अव्वल स्थानावर कायम आहे.
मॅट हेन्री आणि काइल जेमिसनचीही रँकिंगमध्ये मोठी सुधारणा –
भारताने ३-१ ने जिंकलेल्या मालिकेतील पाचव्या सामन्यात अर्शदीपने ३० धावांत ३ विकेट्स घेण्यासोबतच अवघ्या ४ चेंडूंत २ षटकारांसह १४ धावा ठोकत ‘सामनावीर’ पुरस्कार पटकावला होता. भारताविरुद्धच्या मालिकेतील चमकदार कामगिरीचा फायदा न्यूझीलंडच्या गोलंदाजांनाही झाला आहे. वेगवान गोलंदाज मॅट हेन्री १५ स्थानांची प्रगती करत संयुक्तपणे १२ व्या क्रमांकावर पोहोचला आहे, तर त्याचा सहकारी काइल जेमिसन यानेही १५ स्थानांची झेप घेत ४५ वे स्थान गाठले आहे.
टॉम बँटनची ३४ स्थानांची ऐतिहासिक झेप; जो रूट टॉप-१० मध्ये
A massive gain for a recent England centurion on the latest update to the ICC Men’s ODI Player Rankings 😲
https://t.co/8XbOp5K1YN
— ICC (@ICC) November 18, 2026
ऑस्ट्रेलियाविरुद्ध अॅडलेड येथे झालेल्या दुसऱ्या एकदिवसीय सामन्यात ९९ चेंडूंत १२१ धावांची शानदार शतकी खेळी करणाऱ्या इंग्लंडच्या टॉम बँटनला मोठे बक्षीस मिळाले आहे. बँटनने फलंदाजांच्या क्रमवारीत तब्बल ३४ स्थानांची मोठी झेप घेत कारकिर्दीतील सर्वोत्तम १३ वे स्थान पटकावले, तर अनुभवी जो रूट दोन स्थानांच्या सुधारणेसह ९ व्या क्रमांकावर पोहोचला आहे.
जोफ्रा आर्चरची टॉप-१० मध्ये धमाकेदार एन्ट्री; सँटनरची घसरण
Here are the latest ICC ODI Batters Rankings following the conclusion of the India vs New Zealand series. 🏏
#Cricket #ODI #Sportskeeda https://t.co/JF9wUlbYyg
— Sportskeeda (@Sportskeeda) November 18, 2026
ऑस्ट्रेलियाविरुद्धच्या सुरुवातीच्या दोन्ही सामन्यांत प्रभावी मारा करणाऱ्या इंग्लंडच्या जोफ्रा आर्चरने चार स्थानांची प्रगती करत टॉप-१० मध्ये पुनरागमन केले असून, तो सातव्या स्थानी पोहोचला आहे. दुसरीकडे, न्यूझीलंडचा अष्टपैलू मिचेल सँटनर एका स्थानाच्या घसरणीसह पाचव्या क्रमांकावर गेला आहे.





