ICC Fines India : न्यूझीलंडविरुद्धची मालिका जिंकल्यानंतर टीम इंडियाला आयसीसीचा मोठा झटका! नेमकं कारण काय? जाणून घ्या
ICC Fines India : न्यूझीलंडविरुद्धच्या पाचव्या एकदिवसीय सामन्यादरम्यान भारतीय संघ निर्धारित वेळेत आपली षटके पूर्ण करू शकला नाही. नियमांचे उल्लंघन केल्यामुळे संघावर कारवाई करण्यात आली आहे.

ICC Fines Team India Slow Over Rate 5th ODI New Zealand Shreyas Iyer : न्यूझीलंडविरुद्धचा पाचवा आणि अंतिम वनडे सामना जिंकून मालिका खिशात घातल्यानंतर आयसीसीने भारतीय संघावर मोठी कारवाई केली आहे. १५ नोव्हेंबर रोजी माउंट मौंगानुई येथे खेळल्या गेलेल्या निर्णायक लढतीत संथ गतीने षटके (Slow Over Rate) टाकल्याबद्दल संपूर्ण भारतीय संघाला सामना शुल्काच्या ३५ टक्के दंड ठोठावण्यात आला आहे. नियमांनुसार मिळणारी अतिरिक्त सवलत जोडूनही भारतीय गोलंदाज निर्धारित वेळेत तब्बल सात षटके मागे राहिल्याने आयसीसीने ही कठोर कारवाई केली आहे.
कर्णधार श्रेयस अय्यरने दंड स्वीकारल्याने औपचारिक सुनावणी टळली –
आयसीसीच्या आचारसंहितेनुसार, निर्धारित वेळेत प्रत्येक कमी पडलेल्या षटकामागे खेळाडूंच्या सामना शुल्कातून पाच टक्के कपात केली जाते; या अंतर्गत कमाल पन्नास टक्क्यांपर्यंत दंड आकारला जाऊ शकतो. भारताने सात षटके कमी टाकल्याने खेळाडूंवर ३५ टक्के दंडाची कारवाई झाली असून, हंगामी कर्णधार श्रेयस अय्यरने सामनाधिकारी रंजन मदुगले यांनी सुनावलेली शिक्षा मान्य केल्याने औपचारिक सुनावणीची गरज भासली नाही.
इशान किशन, अक्षर पटेल आणि अर्शदीपच्या जोरावर भारताचा २२ धावांनी थरारक विजय
India have been penalised for breaching ICC Code of Conduct in the fifth and final ODI against New Zealand.
Details 👇
https://t.co/ZGULO5ePDT
— ICC (@ICC) November 18, 2026
पाचव्या एकदिवसीय सामन्यात सुरुवातीच्या धक्क्यांनंतर इशान किशन आणि अक्षर पटेल यांनी प्रत्येकी ४६ धावांची महत्त्वपूर्ण खेळी करत भारताला २०९ धावांपर्यंत पोहोचवले होते. प्रत्युत्तरात भारतीय गोलंदाजांनी न्यूझीलंडला १८७ धावांत गारद करत २२ धावांनी विजय मिळवला, ज्यात अष्टपैलू कामगिरी करणारा अर्शदीप सिंग सामनावीर ठरला.
न्यूझीलंड दौऱ्यात भारताने टी-२० आणि वनडे दोन्ही मालिकांवर कोरले नाव –
या संपूर्ण न्यूझीलंड दौऱ्यात भारतीय संघाने वर्चस्व गाजवत प्रथम टी-२० मालिका ३-२ ने जिंकली, तर एकदिवसीय मालिकेतील पहिले दोन सामने जिंकल्यानंतर तिसरा सामना पावसामुळे रद्द झाला आणि चौथा सामना गमावल्यानंतर पाचवा सामना जिंकत वनडे मालिकाही ३-१ ने आपल्या नावावर केली.





